İmam bayıldı

Törek tabınnarında bik yış oçrawçı azıq-tölekneñ berse - baklajan. Älege şämäxä yäşelçäneñ tuğan cire - Hindstan. Törkiyägä ul soñınnan kilsä dä, aş-sularda ayırım urın alıp tora. Biredä baklajan belän peşerelgän yözlärçä rizıq barlığın söyläsäk - yalğış bulmas. Ul salat, käbap, tozlağan yäşelçä, tutırma şikelle aşamlıqlarnıñ töp öleşe.

Bügen sezgä, inde añlağansızdır, baklajan belän rizıq xäzerlärgä öyrätäbez. Anıñ iseme - “imam bayıldı”. Tatarçağa tärcemä itkändä ul “imam xuşınnan yazdı” bula.  Bu isemneñ qayan kilep çığuı turında bik küp rivayät’ bar. Bersendä älege rizıqnı aşap qarağan imamnıñ tämlelegennän huşın yuğaltuı äytelä.

İmam bayıldı, ayıruça, cılı cäyge könnärdä yaratıp aşala. Anı vegan häm vegetariannar da üz raśionına kertä ala.

İmam bayıldı rizığın peşerergä totınğançı kiräk bulaçaq azıq-tölekne barlap çığıyq.

4 danä baklajan

baklajannarnı qızdıru öçen 2 stakan zäytün mayı

2 danä urtaça zurlıqtağı suğan

12 teş sarımsaq

3 danä neçkä yäşel borıç

3 danä pomidor

3 çemetem toz

3 çemetem qara borıç

1 çäy qalağı şikär qomı

yartı uç petruşka

suğannı qızdıru öçen 1 aş qaşığı zäytün mayı

Xäzer peşerügä kereşäbez. Başta baklajannarnı yuıp sabınnan asqa taba sızıq-sızıq itep ärçibez. Şunnan soñ yäşelçälärne qızğan zäytün mayında böten kileş yomşağanğa qadär ike yaqtan qızdırabız. Qızdırğan bersen maydan alıp qäğaz’ tastımallarğa tezäbez.   

Suğannarnı yarım bocra räweşendä, sarımsak belän borıçlarnı keçkenä kisäklärgä turıybız. Barısın bergä 1 aş qaşığı zäytün mayında yomşarğançı berniçä minut peşeräbez. Östenä qabığı ärçelgän, orlıqları çığarılğan häm turalğan pomidorlarnı quyabız. Alar peşkäç toz, qara borıç, şikär qomı häm petruşka östäp bolğatkannan soñ astın sünderäbez.

Baklajannarnı kästrülgä tezäbez. Urtasına pıçak yärdämendä sızıq yasap qaşıq belän kiñäytep köymä şikelle açabız. Êçenä pomidorlı qatnaşmanı quyabız. Tabada qalğan tomatlı sunı kastrül’neñ töbenä salabız. Beraz ğına zäytün mayı östärgä bula. Östen qaplap 20-25 minut peşeräbez. Bu rizıqnı bülmä cılılığında yäisä suıq kileş tabınğa birälär. Aşlarığız tämle bulsın!