Päxläwä

Törek aş-suları 23

Päxläwä

Päxläwä - bik yuka itep cäyelgän qatlı-qatlı qamırnıñ êçenä waqlanğan fistaşka, Ästerxan çikläwege yäisä urman çikläwege quyıp peşerelgännän soñ şirbät belän tämländerelä. Bu barı tik Törkiyägä genä xas rizıq tügel. Balkannardan Yaqın Könçığışqa qadär taralğan. Ämma çın gurmannar iñ yaxşı päxläwäneñ Törkiyädä, Gaziantäp töbägendä yasaluın söyli. Ä xäzer süzne ozaqqa suzmıyça niçek peşerergä ikänen qarıyq.  

Başta kiräk bulaçaq azıq-tölekne barlap çığabız:

3 yomırqa

1 stakan söt

1 stakan sıyıq may

1 bal qalağı qamır qabartuçı

1 aş qaşığı serkä

qalaq oçında toz

5 stakan on

2 stakan waqlanğan fistaşka yäisä Ästerxan çikläwege

1 stakan yarım kukuruz kraxmalı

yartı bal qalağı limon suı

250 gramm êretelgän atlanmay

Şirbät öçen

4 stakan şikär qomı

5 stakan su

yartı bal qalağı limon suı

Xäzer çirat päxläwäne äzerläwdä. Başta qamırnı yasıybız. Onnı tirän sawıtqa salabız. Anıñ urtasına beraz çoqır yasıybız. Şunda yomırqa, söt, sıyıq may, qamır qabartuçı, serkä häm toznı salabız. Äkren genä bolğatıp yomşaq qamır xäzerlibez. Sawıtnıñ östen dımlı çüpräk belän qaplap bülmä cılılığında ber säğat’ totabız. Şulay beraz yal ittergännän soñ, qamırnı yegerme berdäy öleşkä bülep, härbersen basabız. Annarı qamır kisäklären kiñ tälinkä zurlığında cäyäbez.  Aralarına kukuruz kraxmalı sipkäläp cäymälärne ber-berseneñ östenä tezäbez. Uqlaw alıp qamırlarnı mömkin qadär neçkä itep qabat cäyep çığabız. İñ äybät kürengän ike cäymäne asqı häm öske qat öçen ayırıp quyabız.

Cäymä qatların maylaw öçen atlanmaynı êretäbez. Zur tabanı şunıñ belän maylıybız. Cäymälärneñ 10 danäsen här qatnı atlanmay belän maylap öste-östenä tabağa tezäbez. 10nçı cäymäneñ östenä waqlanğan çikläweklärne tigez itep sibäbez. Qalğan cäymälärne dä şunıñ östenä maylap tezep beteräbez. Cäymälärneñ qırıyın tabanın astına taba êtep quyabız. Päxläwäne ütken pıçaq belän romb yäisä dürtpoçmaq räweşendä kisep çığabız. Qalğan atlanmaynı östenä sörtäbez.

Päxläwäne aldan cılıtılıp quyılğan miçtä 180 gradusta öste qızarıp, qatları beräm-beräm açılğançı yaqınça 50 minut peşeräbez. 

Päxläwäneñ şirbäten xäzerläw öçen şikär qomın su belän tirän kästrüldä bolğatabız häm urtaça utta 25 minut qaynatabız. İñ axırdan limon suı östäp astın sünderäbez. Miçtän alğan cılı päxläwälärneñ östenä bakraç belän cılı şirbätne äz-äzläp salabız häm señderüen kötäbez. Soñınnan telemläp tabınğa biräbez.  



Bäyläneşle xäbärlär