Nogayça 75: İymandıñ yahşılıgı (1)
Bu yuma “İYMANDIÑ YAHŞILIGI” baresinde söz bardıramız!
İymandaqı yahşılıqtıñ
Sanı miñlerdi ozgan...
Sosınlardıñ köbini em
Allah insanga bergen...
Nege desek so adem,
İymandakı nurmınan
Bizim bilmegenimiz,
Anca Quday bilgeni
Ullılardın ullısı;
Neşe derecelerge,
Köterilgen de ketken...
Em yennetke tiyisli
Bolgan orınga şıqqan...
Nege desek so iyman,
Bîr ademdi, Calallı
Rabb’ımızga baylagan...
Demek iymanniymeti,
Allah’pınan bizlerdi,
Baylaytagan bav bolgan...
Bav degendiñ akiqatı,
Neşe yahşı mane bolgan:
Misal bolsa bîr asker,
Davletke baylanganga,
Davletdey quvvat tapqan.
Bîr asker so bavmınan,
Davletten emir alsa,
Bîr şahardi bîr yerge,
Cıymaga küşi yetken!
Davlet bavı bolmasa,
Adem asker bolmasa,
Sosı küşini yoytqan...
Är kimdiñ baylanganı,
Biyik bolsa so tagı,
Sosı bavından sebep,
Ol tagı biyik bolgan...
Bîr davletke ya padşaga,
Baylangan bîr adem,
Sosı biyiklikke yetse,
Ya Allah’qa baylangan
Biyikligi qayda bargan?
Küşsiz zayıf bîr insan,
Allah’qa iymanıman,
Neşe biyik derecege,
Ol bavmınan yetip bargan...
So barede oylanıyaq
Basqa neşe mane bar...
So mane biraz taga,
Kengeytilip aytılsa,
Nav insandıñ qıymatına,
Basqa sebep em bolgan...
Nege desek so insan,
Allah’qa iymanıman,
Özi üstünde Hak’tan,
Kelgen yahşı sanatpan,
Kuday’dıñ miñlerşe,
Yahşı gözel atlarından
-Yani “Esma-i Hüsna”sından-
Neşe öner tasıgan...
Soga misal berilse,
Közi, qulagı, qalbi,
Qolı, qası em bası,
Tagı barı müşesi,
Yahşı etip tüzelgen...
Munavılardıñ yanında
Süygeni em acıganı,
Aşuvlanıp oylaganı,
Yüregini tolturgan...
Aqlı, pikri, hayali,
Neşe barı qasiyet,
Kuday’dıñ bergeninden
Anca bîr kesek bolgan...
Sosınlardıñ baresi,
Rab’tıñ yahşı atlarına,
Parlaq pıyala bolgan...
Ene sosı maneler,
İymanmınan belli bolgan...
İyman bolmay inkar bolsa,
Barı mane yoq bolup
Kuday’dıñ insanga
Bergen barı sıpatı,
Qaranlıqqa tüseberip
Körülmegen yasırgan.
So insandıñ qıymatı,
Anca teninde bolgan...
Tenindeki qıymat tagı,
Bîr zat qalmay şürügenge
Soñda yoq bolup ötken...
İnşallah so barede,
Allah kömek berse bizge,
Keliyek yuma devam etip
Qalganlardı aytsaq sizge...
Savlıqpan qalıñız!
Dr. Yusuf ALTINIŞIK
E-mail: altinisikyusuf@gmail.com