Atatörekne soñğı yulğa ozatu turındağı dokumentlar - kürgäzmädä

Böyek şäxezneñ cenazası belän bäyle qayber arxiv dokumentları berençe tapqır xalıqqa kürsätelä

Atatörekne soñğı yulğa ozatu turındağı dokumentlar - kürgäzmädä

Törkiyä cömhüriyätenä nigez salğan böyek yulbaşçı Mostafa Kemal Atatörekneñ ülemenä 81 yıl tulğanda anıñ soñğı yulğa ozatıluı belän bäyle mäğ’lümatlar urın aluçı tarixi dokumentlar 10nçı noyabr’dä Anıtkabirdä kürgäzmägä quyılaçaq.

Çara “Dolmabahçädän Anıtkabirgä” dip atala. Kürgäzmädä Mostafa Kemal Atatörekneñ wafatınnan soñ 1938nçe häm 1953nçe yıllar arasında Dolmabahçädän Anıtkabirgä soñğı yulçılığı belän bäyle 12 dokument täwge tapqır cämäğat’çelekkä kürsätelä. Alar däwlät arxivında saqlanğan.

Dokumentlar arasında polkovnik Ruxi Tävällioğlunıñ İstanbul xakimiyäte başlığı urınbasarı Äkräm Säväncanğa cibärgän yazuı iğ’tibarnı cälep itä. Anda Atatörekneñ gäwdäsen İstanbuldan İzmitkä iltäçäk xärbi korabta 200 keşeneñ bulacağı äytelä.

Kürgäzmädäge êksponatlar arasında Atatörekneñ cenazası öçen xäzerlängän tabutnıñ xisabı häm tüläw kvitanśiyäse, yulbaşçınıñ qız tuğanı Makbulä xanım tarafınnan moxtaclarğa öläşengän 2 meñ 555 lira turında dokument bar.

Arxiv çığanaqlarınnan kürengänçä, Atatörekneñ cenazasında bik küp çit il qunaqları da qatnaşqan. Bu xaqta tışqı êşlär ministrlığı protokolı isemlege söyli. Kürgäzmädä Atatörekne sonğı yulğa ozatırğa kilgän çit il qunaqlarınıñ Änkara Palas qunaqxanäsendä tuqtaluları turında dokumentlar da urın ala.  

Êkspoziśiyädä şul çorda çıqqan gazet häm jurnallarnı da kürergä mömkin. Alar yulbaşçı belän mäñgelekkä xuşlaşu mizgelläre häm xalıqnıñ äçe xäsräten çağıldıra.



Bäyläneşle xäbärlär