Distälärçä yıllıq okkupaśiya (оккупация) külägäsendä fälästinlelärneñ çarasız qarşı toruı

"Xamas"qa bäyle "Qassam xärbi brigadaları" belän Ğazzädä urnaşqan qalğan fälästinle törkemnär “Aqsa tufanı” isemle İzrailğa qarşı zur xärbi operaŝiya başlattı. Ozın äzerlek barışınnan soñ syurpriz höcüm belän Ğazzädäge blokadanı tişkän qorallı qarşılıq kürsätüçelär töbäktäge İzrail bazaların qulğa töşerde, şulay uq yähüd bistälärendä yäşäwçelärne dä maqsat itep aldı. İzrail isä berençe şoktan soñ Ğazzägä qarata hawadan bombağa totunı başlattı. İzrail armiyaseneñ töbäkkä qarağan ciröste operaŝiyasenä äzerlänüendä, Livan – İzrail çigendä dä "Xizbullah" belän qaywaqıt bäreleşä başlawında töbäk öçen zur suğış riskı bar.

"Xamas"nıñ qorallı törkeme bulğan "İzzetin Qassam xärbi brigadaları" häm anıñ belän bergä êş başqaruçı Ğazzädäge fälästinle qarşılıq kürsätüçelär İzrail küzläwe häm armiyase kötmägändä zur höcüm başlattı. Kürengänçä, fälästinle törkemnär inde küptännän yäşeren räweştä bu operaŝiyağa äzerlänep, texnik mömkinleklären dä nığıtqan. Urtaqlaşılğan videoyazmalarda "Qassam" häm qalğan törkemnärneñ dron häm paramotor kebek ob’yektlarnı da qullanıp, Ğazzä tirä-yağında urnaştırılğan 4 İzrail bazasın ber ük waqıtta qulğa töşerüen kürep bula. Yözlärçä fälästinle suğışçı töbäktäge yähüd bistälärenä kerep, bu urınnarnı zur ülçämdä qulğa töşerä aldı. Annarı isä 200 tiräse ğaskäri häm izraillene äsirlekkä alıp, Ğazzägä kiterde.

İzrail armiyase häm küzläwe zur köçsezlek kiçerde, yuğaltular İzraildä şok täêsiren tudırdı. İzrail armiyase Ğazzäneñ 2 qatı qadär diyärlek mäydannı 48 sägät’ buyı kontrol’ itä almadı. Berençe qatışulardan soñ Ğazzäne awır räweştä bombalıy başladılar. Ğazzädä bolay da bulğan blokadanı absolyut yasap, töbäktä ut häm sunı da beterdelär. İzraille säyäsätçelär häm xärbi räsmi zatlar bik qırıs açıqlawlar yasağanda ciröste operaŝiyase äzerlegenä dä basım yasala. İzrail ap-açıq räweştä suğış cinayäte başqarıp, yaqınça 2 million keşe yäşägän Ğazzädä kollektiv cäzağa tarta. Şähärdä tormış tuqtap qaldı, bombağa totuda tınıç xalıq ta ülä. Xäzergä qadär meñ tiräse Ğazzä keşese yaqtı dön’yadan kitte. Kassam xärbi brigadaları isä raketa ırğıtıp häm qaywaqıt tunnel’ qullanıp, İzrailgä cawap qaytara.

İzrailneñ tön’yağında Livan çigendä dä waqıtı belän bäreleşlär küzätelä. "Xizbullah" belän İzrail armiyase ber-bersenä ut aça. Läkin monıñ da kontrol’dän çığuı ixtimal. İzrail armiyase Ğazzägä qarşı cir öste operaŝiyase başlatsa, Livan frontınıñ açıluı mömkin. AQŞnıñ töbäktä avianoseŝlar belän urnaşa başlawın da küz aldında totsaq, êşlär butalçıq xälgä kiläçäk. İzrail üzenä qarağan bu höcümneñ artında İrannıñ toruın assızıqlıy. Soñğı yıllarda Xamaska İrannıñ citdi räweştä xärbi yärdäm kürsätüen härkem belä. İrannıñ töbäktäge Ğaräp-İzrail normal’läşüenä kirtä quyu öçen mondıy adım yasawın äytälär. Läkin bu kon’yunktura belän geosäyäsi adımnardan tış çınbarlıqnı onıtmasqa kiräk.

Fälästinlelär 75 yıldan artıq İzrail yawı astında yäşi, cirläre urlana, üterelälär, qaçaq wazğıyätenä töştelär. Könbatışlı köçlär isä İzrail yaqlı. Xäzerge çiktän tış uñçı, sionist xaqimiyät bulğan Netan’yaxunıñ kabinetı häm ğamälgä kertüläre fälästinlelärneñ ömeten özep, alarnı çarasız räweştä xärbi yaqtan qarşılıq kürsätergä êtärä. Moña yärdäm qulın suzuçı berdänber il isä – İran. Bar dönya fälästinlelärneñ xaqların garantiyaläwçe 2 däwlätle çişeleş turında qayğırtırğa tiyeş. Başqalası Qodüs (Yerusalim) häm cir bötenlege bulğan suveren Fälästin däwläte qorılmıyça töbäktä totrıqlılıqnı täêmin itü berqayçan da mömkin bulmayaçaq.

Can ACUN

SETA säyäsät, iq’tisad häm cämğiyät tikşerenüläre waqıfınıň tışqı säyäsät tikşerenüçese