Qor'änne yandırğan Momika Şveśiyädän quıla

Şveśiyä soñğı aylarda Qor’än-i Kärimne yandıru provokaśiyäläre başqarğan ğıyraqlı Salvan Momikanı, ildä qalu waqıtı tögällängännän soñ, deportaśiyälärgä qarar qıldı.

Migraśiyä oyışmasınıñ matbuğat xezmäte süzçese Jesper Tengrot TV4 kanalına beldergänçä, Momikanıñ 2024nçe yılnıñ16nçı aprelenä qadär Şveśiyädä êşläw häm yäşäw röxsäte bar. Şunnan soñ anıñ ildä qaluı mömkin bulmayaçaq.

Tengrot bu qararnı Momikanıñ yalğan söyläwe arqasında çığaruların äytä. “Yäşäw häm êşläw röxsäte öçen viza möräcäğatendä älege şäxesneñ yalğan mäğ’lümat citkerüen açıqladıq häm şul säbäple deportaśiyälänüenä qarar çığardıq. Bu keşeneñ 5 yıl buyına Şveśiyägä kerüe tıyıldı,”-dide ul.

Momikanıñ älege deportaśiyä qararına qarşı çığıp Migraśiya mäxkämäsendä däğ’wa açuı kötelä.

İsegezgä töşeräbez, Ğıyraqtan Şveśiyägä küçengän Salvan Momika başqala Stokgol’mda Qorban ğäyeteneñ berençe könenä turı kilüçe 28nçe iyün’dä mäçet qarşına basıp poliśiya sağı astında Qor’än-i Kärimne yandırdı.

Ul 20nçe iyül’dä Ğıyraqnıñ Stokgol’m ilçelege qarşında, 14nçe häm 31nçe iyül’dä Şveśiyä parlamentı qarşında Qor’änne häm Ğıyraq bayrağın ayaq astına salıp taptadı. 24nçe avgustta Momika Stokgol’m mäçete yanında qabat Qor’änne yandırdı.

Momika 3nçe sentyabr’dä Malmö şähärendä qabat Qor’änne yandıru çarası ütkärde. Aña qarşı çığarğa mataşqan 15 keşeneñ saq astına alınuınnan soñ protestlar oyıştırıldı.

Momikanıñ axırğı çığışı 21nçe oktyabr’dä Stokgol’m üzägendä ide. Ul İzrailgä teläktäşlek mitingı oyıştırıp Qor’änne häm Fälästin bayrağın yandırdı.