Urlanğan 4 amerikalınıñ yazmışları bilgele buldı

Meksikanıñ Matamoros şähärendä qorallı keşelär urlağan 4 Amerika watandaşınıñ ikese üle kileş tabıldı.

Meksika däwlät başlığı Andres Manuêl’ Lopes Abrador matbuğatqa yasağan belderüdä älege waqıyğağa nıq borçıluın belderde häm qorbannarnıñ ğailäläre, yaqınnarı, Amerika Quşma Ştatları xalqı, xökümäteneñ qayğısın urtaqlaştı. “Prokuratura 4 AQŞlıdan ikeseneñ ülüen, ber keşeneñ yaralanuın häm tağın berseneñ isän buluın rasladı. Êşebezne däwam itäçäkbez,”-dide ul.

BBCneñ AQŞ cirle matbuğatına tayanuçı xäbärendä äytelgänçä, urlanğan amerikalılarnıñ ikese ğailälärenä tapşırıldı, berse awır yaralı. Yaqınnarı citkergänçä, alar Meksikağa plastik xirurgiyä operaśiyäse öçen barğan.

Waqıyğa belän bäyle räweştä 24 yäş’lek Xose N isemle beräwneñ saq astına alınuı citkerelde. Üle kileş tabılğan 2 keşeneñ mäyete AQŞqa cibärelgän.  

Aq Yort milli iminlek şurası strategik êlemtä koordinatorı Djon Kirbi da onlayn matbuğat cıyılışında AQŞ watandaşlarına qarata höcümnärne, qayda häm nindi genä şartlarda buluına qaramastan, qabul itmäyäçäklären äytte. Bu waqıyğada da ğadellek urnaştıru öçen Meksika xökümäte belän bergä êşläyäçäklär.  

AQŞ federal’ tikşerenü byurosı 3nçe martta 4 amerikalınıñ Meksikanıñ Tamaulipas töbägendäge Matamoros şähärenä kilgännän soñ bilgesez qorallı keşelär höcümenä duçar buluın häm urlanuın belderde.