Qıtaydağı cir teträwdä ülüçelär sanı arta

Uzğan könne Qıtaynıñ könbatışındağı Sıçuan’ provinśiyäsendä bulğan 6,8 ball zurlığındağı cir teträwdä ğomerlären yuğaltqan keşelär sanı 74 kä citkän.

Milli matbuğattağı xäbärlärgä qarağanda, zilzilädä 259 keşe cäräxätlängän, 26 keşe xäbärsez yuğalğan.

Cir teträw näticäsendä su, êlektr, transport häm telekommunikaśiya asqorması zıyan kürgän, afät töbägendä yabılğan yullar iyärçen zilzilälär, köçle yañğır häm cir şuışu qurqınıçı arqasında qotqaru häm yärdäm êşlären başqaru bik awır bara.

Sıçuan’ provinśiyäse - Qıtayda zur cir teträwlär bulğan töbäklärneñ berse.