Ukraina: "Yelenovka törmäsen ruslar bombaladı"
Ukrainalı äsirlär totıluçı törmägä höcüm öçen ike yaq ta ber-bersen ğayepli
Ukraina tışqı êşlär ministrı Dmitro Kuleba ukrainalı äsirlär totıluçı Yelenovka törmäsen ruslarnıñ bombalawın citkerde. Ul Twitterdağı yazmasında älege höcümgä qarata BMOnıñ Rusiyägä rizasızlıq belderüe kiräklegen äytte.
“Ukrainalı xärbilärneñ Azovstal’dän êvakuaśiyäsen ciñelläştergän BMOnı Rusiyäne Yelenovka törmäsen bombalawı öçen kisken ğayeplärgä häm bu äşäke cinayät’neñ barlıq döreslegen açıqlaw öçen töbäkkä kilergä çaqıram,”-dip yazdı Kuleba.
Ministr Xalıqara Qızıl Xaç komitetın da ukrainalı äsirlärneñ xälen kontrol’ itärgä çaqırdı.
Rusiyä isä älege törmäne Ukraina köçläre bombalawın alğa sörä. İlneñ saqlanu ministrlığı süzçese İgor’ Konaşenkov Ukraina armiyäseneñ Yelenovka toraq punktı yänäşäsendäge ob’yektqa AQŞta yasalğan yuğarı näticäle artilleriyä reaktiv sisteması HIMARS belän raketa cibärüen citkergän ide. Ul höcümdä äsirlekkä töşkän ukrainalı ğaskärilärneñ 40ınıñ hälaq buluın, 75eneñ yaralanuın äytte.
