İtaliyädäge faciğada ülüçelär sanı 11gä citte

Al’ tawlarınıñ İtaliyä yağında qalğan Marmolada qalqulığında boz qatlamınıñ işelüe näticäsendä ğomere özelüçelär sanı 11gä citte.  

İlneñ ANSA agentlığı yazğança, êzläw-qotqaru törkemnäre hälakät waqıtında yuqqa çıqqan tağın ber keşeneñ üle gäwdäsen taptı.

Ğomere özelüçelärneñ 9ınıñ İtaliyä, 2seneñ Çexiyä watandaşı buluı belderelde.

Hälakätneñ nicek kilep çığuın tikşerü däwam itä.

İsegezgä töşeräbez, waqıyğa 3nçe iyül’dä buldı. Boz kisäge cimerelgändä şunda bulğan al’pinistlar törkeme hälakätneñ urtasında qaldı.  

İtaliyädä küpmeder waqıt çiktän tış êsselär xakimlek itä. Marmolada qalqulığında 2nçe iyül’dä cılılıq +10 gradus bula. Bu älege tawda moña qadär kürelgän iñ yuğarı temperatura.

Wäqalätlelär İtaliyädäge iñ zur boz qatlamnarı bulğan Marmolada qalqulığında 15-30 yıl êçendä global’ cılınu säbäple hiç boz qalmayaçağı turında kisätä.