Germaniyä, Franśiyä häm İtaliya liderları Kiyevta

Franśiyä ilbaşı Êmmanuêl’ Makron, Germaniyä kanślerı Olaf Şol’ś häm İtaliyä xökümäte räise Mario Dragi Ukrainanıñ başqalası Kiyevta. 3 lider biredä Ukraina däwlät başlığı Volodimir Zelenskiy belän oçraşaçaq.

Germaniyä kanślerı Olaf Şol’ś yulda yasağan belderüendä Awrupa iq’tisadi cämğıyäteneñ tözeleşendä urın aluçı 3 zur däwlätneñ liderınıñ Kiyevqa baruı häm suğışnıñ bu êtabında Ukraina häm xalqına teläktäşleklären kürsätüneñ ähämiyätle buluın söyläde.

Şol’ś barı tik teläktäşlek tügel, Ukrainağa finans, gumanitar häm qoral yärdämnäreneñ dä däwam itäçäge turında garantiyä birergä teläwlären äytte.

Germaniyä kanślerı Rusiyägä qarata sankśiyälärneñ dä zur ähämiyätkä iyä buluın assızıqladı. Ul älege çikläwlärneñ Rusiyäne suğıştan baş tartu häm ğaskärlären Ukrainadan çığarırğa êtärü maqsatında buluın da östäde.

Bügenge säfär Ukrainanıñ könçığışında Rusiyä belän köçle bäreleşlär häm global’ azıq-tölek krizisı basımnarı bulğan waqıtqa turı kilde.

24nçe fevral’dä Rusiyä-Ukraina suğışı başlanğannan birle bik küp Könbatış liderı Kiyevqa barıp qayttı. Şol’śnıñ barmawı isä tänqıyt’läwlärgä säbäpçe buldı.