İspaniyädä Kovid-19 gripp däräcäsenä töşerelde

İspaniyä koronavirus kizüen monnan soñ gripp şikelle qabul itärgä qarar qıldı häm töp kisätü çaraların beterde.

Cämäğat’çelek sälamätlegen kontrol’dä totu häm küzätep baru strategiyäse komissiyäseneñ bügennän ğamälgä kergän qararı nigezendä, ildä Kovid-19nıñ ciñelçä häm simptomsız oçraqları mäcbüri karantin qısalarınnan çığarıldı. Bu barı mediśina üzäkläre, qartlar yortı häm törmälär şikelle urınnarda êşläwçelärgä genä qağılmıy. Alar öçen êlekkege karantin şartları ğamäldä, ä qalğannar isä koronavirus yoqtırsa da köndälek tormışın däwam itä ala. Döres, awırtu bilgeläre urtaça yäisä yuğarı däräcädä kürelgändä, awır grip oçraqlarındağı şikelle, êştän yal alıp öydä däwalanırğa kiräk bulaçaq.

Yaña qarar belän Kovid-19 yoqtırğan keşelärneñ êlemtä törkemnäre belän bäyläneşlären küzätü dä tulısınça beterelä.

İspaniyä sälamätlek saqlaw belgeçläre koronavirusnıñ kizü êtabınnan çığuına ışana. Alar monnan soñ Kovid-19dan xastaxanädä däwalanuçılar häm zäğıyf’ törkemnärgä kerüçe qartlar häm xronik awırularğa iğ’tibar yünältäçäklären belderä.