Ukraina yuğaltular turında belderde
Bügen irtängä 3 meñ 500dän artıq Rusiyä soldatınıñ üterelüe häm 200eneñ äsirlekkä alınuı bilgele
24nçe fevral’dä xärbi xäräkätneñ başlawınnan soñ Ukraina 3 meñ 500dän artıq Rusiyä ğaskäriyeneñ täêsirsez xälgä kiterelüen, 14 xärbi oçqıç, 8 boralaq, 102 tank häm 536 bronetexnikanıñ yuq itelüen belderde.
Ukraina ğomumştab idaräse Rusiyäneñ çik töbäklärenä östämä xärbi berleklär urnaştıra başlawın xäbär itä.
Ukraina prezidentı ofisı citäkçese urınbasarı Mixail Podolyak ta ilendäge wäzğıyät’ turında mäğ’lümat birde. Ul Xerson, Mikolayev, Odessa häm Mariupol’ qalalarında bäreleşläneñ däwam itüen citkerä.
Podolyak Ukraina qorallı köçläre belän poliśiyäneñ ildäge wäzğıyät’ne kontrol’dä totuına iğ’tibarnı cälep itte. Başqala Kiyev häm anıñ tiräsendä dä xäl totrıqlı.
“Bügen irtängä 3 meñ 500dän artıq Rusiyä soldatı üterelde häm 200e äsirlekkä alındı,”-dide Podolyak.
Ukrainanıñ üzeneñ yuğaltuları 198gä citte, alarnıñ 3se bala. Şulay uq ilneñ sälamätlek saqlaw ministrlığı 115 keşeneñ yaralanuın da citkerde.
