Putinnıñ häm Lavrovnıñ Awrupadağı aktivları tuñdırılaçaq

Awrupa Berlege Rusiyä İlbaşı Vladimir Putin belän Tışqı êşlär ministrı Sergey Lavrovnı sankśiya isemlegenä kertüen iğ’lan itte.

Rusiyäneñ Ukrainanıñ könçığışındağı güya cömhüriyätlärne tanuı arqasında Rusiyä finans oyışmaların häm bankların maqsat itep alğan Awrupa Berlege bu yulı tağın da alğaraq adım yasadı.

Awrupa Berlege yuğarı wäkile Josep Borrel’ Ukrainada atnakiçen xärbi xäräkät başlatqan Rusiyäneñ Däwlät başlığı Vladimir Putin belän Tışqı êşlär ministrı Sergey Lavrovnıñ sankśiyälär isemlegenä kertelüen, Awrupadağı aktivlarınıñ tuñdırılaçağın belderde.

AB äğ’zase illärneñ tışqı êşlär ministrları Rusiyäneñ Ukrainağa xärbi operaśiyası arqasında Bel’giya başqalası Bryussel’dä çirattan tış cıyılğan ide.

Şul uq waqıtta Britan prem’yır-ministrlığı ofisı Baş ministr Boris Djonsonnıñ Rusiyäneñ Ukrainağa qarşı xärbi qatışuı tikşerelgän NATO çirattan tış sammitındağı çığışı belän bäyle yazmaça belderü yasadı.

Belderügä kürä, Djonson NATO liderlarına Ukrainanı fälaqatneñ çolğap aluın häm Putinnıñ salqın suğıştan soñğı tärtipne bozu öçen üç alu missiyası belän şöğıllänüen belderde.

Djonson Angliyanıñ atnakiçen açıqlağan çikläwlär paketına östämä bularaq ileneñ Putinğa häm Lavrovqa qarata yaqın waqıtta sankśiya qullanaçağın iğ’lan itte.

Şul arada Amerika Quşma Ştatlarınıñ da Vladimir Putin, Sergey Lavrov häm Rusiyä iminlek wazıyfalılarına qarata sankśiya qararın qabul itüe belderelde. Qararnı Aq yort süzçese Jen Psaki citkerde.