Omikronnıñ tağın da mäkerle sub-variantı işek şaqıy

Bötendön’ya sälamätlek saqlaw oyışması ğomum mödire Tedros Adxanom Gebreyesus koronavirusqa qarşı qaysı da bulsa ilneñ ciñü iğ’lan itüe yäisä bireşüenä bik irtä buluın belderde. Ul 2020nçe yılnıñ 30nçı ğıynvarında xalıqara mediśinanıñ ğadättän tış xäl turında belderüenä 2 yıl tuluı uñayınnan matbuğat oçraşuı uzdırdı.  

İke yıl êçendä dön’ya külämendä 370 million Kovid-19 yoqtıru oçrağı häm 5 million 600 meñ ülem terkälde. “Ul çaqta äle 100dän azraq oçraq bar ide häm Qıtaydan başqa cirdä ülüçe bulmadı,”-dip iskä ala Gebreyesus.

Xäzer menä koronavirusnıñ Omikron variantı açıqlanuğa 10 atna waqıt üzde häm dön’yada 90 million oçraq terkälde. “Bu san 2020nçe yılda belderelgän tulayım yoqtıruçılardan artığraq. Dön’yanıñ küp öleşendä ülemnärneñ borçu tudıruçı artuın küzätäbez,”-di belgeç. Gebreyesus virusnıñ xätär buluın häm küz aldıbızda êvolyuśiyä kiçerüen xäterlätte. 

Ğalimnär äle haman Omikron variantı häm anıñ original xälennän tağın da “mäkerle” BA.2  sub-variantın küzätä. Şuña kürä kizüneñ çigenüen uylarğa yäisä aña bireşergä bik irtä.

Bötendön’ya sälamätlek saqlaw oyışmasınıñ immunitet, vakśinalaştıru häm biologiya bülege mödire Katerina Obrayan Kovid-19 vakśinalarınıñ Omikronnan saqlaw köçe turındağı sorawğa bolay dip cawap birde: “Xäzerge vakśinalarnıñ Omikronğa qarşı yoğıntısı bar. Bigräk tä östämä dozalarnıñ yasaluı älegä qadär yuğarı risk törkemnärenä uñay täêsir itte. Bu preparatlarnı ideal’ dip äytä almıybız, tik niqadär kübräk keşe qadatsa, virusnıñ äyläneşe dä şulqadär kimiyäçäk”.

Obrayan vakśinalar citärlek bulğan küp kenä ildä koronavirus arqasında xastaxanägä salınuçılarnıñ başlıça anı qadatmawçılar buluına iğ’tibarnı cälep itte. 

“Küp keşe yalğış mäğ’lümat aluı arqasında ğomer saqlawçı sıyfatqa iyä vakśinalarnı qadatmasqa qarar birä,”-di Katerina Obrayan.

Bötendön’ya sälamätlek saqlaw oyışmasınıñ baş belgeçe, tabib Sum’ya Svaminatan Kovid-19 variantları häm vakśinalarnıñ täêsirlelek däräcäsen gel küzätep baruların belderep bolay dide: “Monnan soñ çığarğa mömkin variantlarnı da beläbez häm xäzerge vakśinalarnıñ bu variantlarğa qarşı niçek üzgärtelergä tiyeşlege mäs’äläsendä tikşerenülär däwam itä”.