Kuşner ğaräplärdän aqça cıyamı?
Tramp kiyäweneñ üz şirkäte öçen ğaräp däwlätlärennän aqça cıyuı belderelä
Amerika Quşma Ştatlarınıñ êlekkege ilbaşı Donal’d Trampnıñ kiyäwe häm kiñäşçese Djared Kuşnernıñ Soğud Ğaräbstanın yaqlawı häm yaña tözegän şirkäte öçen älege ildän millionnarça dollarlıq fond aluı söylänä. Bu xaqtağı xäbär “Vanity Fair” jurnalında çıqtı. Ul älege mäs’älägä yaqın çığanaqlarğa nigezlänä.
Xäbärgä qarağanda, Kuşner Aq Yortta bulğan waqıtta Soğud Ğaräbstanı prinśı Möxämmät bin Sälman belän yaqın mönäsäbät tözi häm, jurnalist Cämal Qaşıqçınıñ üterelüen dä kertep, täxet varisınıñ ğamällären yaqlıy.
Tramp wazıyfasına kereşkännän soñ Kuşner anı berençe çit il säfären Soğud Ğaräbstanına yasarğa künderde. Monnan tış, ilbaşınıñ Möxämmät bin Sälmannı maxsus aş mäclesenä çaqıruın täêmin itte.
Kuşner idarädän kitkännän soñ “Affinity Fairs” şirkäten tözede. Anıñ öçen ul Farsı qultığı däwlätlärennän aqça cıyarğa mataştı. Başta Katarnıñ qapqasın qaqtı, tik anda uñay cawap bulmağaç, Berläşkän Ğaräp Ämirlekläre belän söyläşte. Alar da Tramp kiyäwenä investiśiyä mäs’äläsendä ışanmıy. Ä menä Soğud Ğaräbstanı Kuşnernıñ şirkätenä millionlağan dollar birergä rizalaşa.
Xäbärdä yazılğança, Kuşner yaña şirkäte öçen kiläse yılğa qadär milliardlağan dollar investiśiyä alırğa planlaştıra.
