Äfğanstan möhacirläre öçen 500 million dollar

AQŞta Djo Bayden idaräse Äfğanstan möhacirläre öçen 500 million dollar östämä aqça bülep birde.

Aq Yorttan yasalğan belderügä qarağanda, älege aqça kötelmägän sıyınuçı häm migraśiyä ixtiyacları, bäreleş qorbannarı häm Äfğanstandağı wäzğıyät’neñ näticäse bularaq xäwef astında qaluçılarnıñ aşığıç ixtiyacların qanäğat’länderü maqsatınnan birelä.

Älege fondtan maxsus migrant vizası öçen möräcäğat’ itüçelärneñ faydalanuı küzallana. Anı xalıqara oyışmalar, ictimağıy berläşmälär häm AQŞ ministrlıqları yärdämendä qullanu mömkin bulaçaq.

İlbaşı Bayden Aq Yortta uzdırğan matbuğat cıyılışında Äfğanstannan çığu qararın böten köçe belän yaqladı. Ul äfğan suğışın kürgän 4nçe ilbaşı buluın häm monı üzennän soñ kiläçäk liderğa tapşırmayaçağın belderde.

Talibannıñ tiz arada ildäge kontrol’ne üz qulına aluda Bayden Äfğanstan idaräse häm iminlek köçlären ğayepläde. “Äfğanstannıñ säyäsi liderları üz xalıqları öçen bergä cıyılu häm illäreneñ kiläçäge öçen söyläşüne başqarıp çığa almadı,”-dide ul.