Vatikan kanadalılardan ğafu ütenäçäkme?
Kanadada cirle xalıqlarnıñ liderları Katolik çirkäwenä taläplären citkeräçäk
Katoliklar dön’yasınıñ ruxani liderı Papa Franśisk Kanadadağı cirle xalıqlarnıñ cämğıyät’läre liderları belän oçraşaçaq. Älege küreşü 2021nçe yılnıñ 17nçe dekabrenä bilgelände.
Kanadada cirle xalıqlarnıñ 3 zur törkeme bar: Berençe Naśiya, metis häm inuit indeyeśları. Dekabr’dä alar Vatikanda papa Franśisk belän ayırım-ayırım oçraşıp Katolik çirkäwenä taläplären citkeräçäk. Cirle xalıqlarnıñ liderlarınıñ teläge - papanıñ Kanadada Rim Katolik çirkäweneñ internat-mäktäplärendä balalar duçar itelgän cäber-zolım öçen isän qalğannardan häm ğailälärennän räsmi räweştä ğafu ütenüe.
1831nçe yıldan başlap 1997nçe yılğa qadär älege mäktäplärdä qotoçqıç waqıyğalar buluı açıqlandı. 139 internatta 150 meñnän artıq cirle xalıqlarnıñ balasın ğailälärennän mäcbüri räweştä tartıp alıp assimilyaśiylilär.
Kanadanıñ räsmi mäğ’lümatlarına qarağanda, balalar älege mäktäplärdä fizik häm censi cäberläwgä duçar bula, kübese açlıq, awırular häm suıqtan ülä. Östäwenä, balalar östendä mediśina täcribäläre ütkärelüe bilgele buldı.
Xristian internat-mäktäplärendäge faciğa öçen Kanadadağı Katolik oyışmalar ğafu ütende. Ämma Vatikan älegä räsmi räweştä bu xatanı qabul itmäde.
