Süriyäle migrantlarnıñ Germaniyädäge tormışı

Berlin üzägendäge desert kibete Süriyäneñ täm-tomnarın yaña kliyentlarğa tanıta.

“Dimäşq desertları” kibete xucası Söläyman Alsakka:

-Almannar yaratır dip uylamağan idek, tik alman kliyentlarıbız ğaräplärdän kübräk buldı. Bu bezne ğacäpländerde.

Söläyman Alsakkanıñ ğailäse täq'dim itkän täm-tomnar qayçandır Xumus şähärendä yäşäwçelärne söyenderä ide. Tik suğış alarnı 40 yıllıq kibetlären qaldırıp kitärgä mäcbür itä. Başta Livan häm Misırğa qaçalar. Annarı, nihayät', 2014nçe yılda Germaniyägä sıyınu xoquqı alalar. Bu yaña ildä tormış ciñel bulmıy.

“Dimäşq desertları” kibete xucası Söläyman Alsakka:

-Süriyädä tormış standartlarıbız yuğarı ide, ber mizgeldä asqa tägärädek häm tormışıbıznı yañabaştan tözergä mäcbür buldıq. Monda kilgändä tel problemabız bar ide, tel kursında rasaçıl mönäsäbätkä duçar buldım. Kibetebezgä küp tapqır höcüm ittelär. Berniçä ay êlek kibet qarşındağı maşinağa ut törttelär.

 Şulay da Söläyman Germaniyägä kilüenä söyenä häm tırışıp êşläwläreneñ näticäse barlığın äytä. Böten awırlıqlarğa qaramastan, Alsakka ğailäseneñ xäzer Berlinda 3 kibete bar. Alarda 25 keşe êşli, kübese süriyäle migrant.

Sibel Karkuş:

-Germaniyä uzğan 10 yılda 630 meñnän artıq süriyälegä sıyınu xoquqı birde. Qayberläre bu ilne öye şikelle yaqın itsä dä, tormış alar öçen awır da, ciñel dä. 2015nçe yılda krizis iñ yuğarı noqtasında waqıtta Germaniyağa kilgän 1 millionnan artıq migrant öçen yaña kiläçäk tözü awır buldı.

Koronavirus kizüe dä ilneñ bu migrantlarnı cämğıyät'kä häm êş tormışına kertep cibärü tırışlıqların qıyınlaştırdı. Äxmät Alsalix bu qaçaqlardan berse.

Süriyä migrantı Äxmät Alsalix:

-Başta maşina belän Törkiyägä kittem, annan Greśiyägä baru öçen keçkenä köymägä utırdım. Soñınnan Serbiya häm Makedoniyağa bardım. Ozın yulçılıq ide häm çiklärne uzu öçen qayber keşelärgä aqça tülärgä mäcbür buldıq. Qayçaq êläkterelep kire cibärelüdän qurqa idem.

Çığışı belän fälästinle bulğan Äxmät Süriydä tuıp üsä häm suğıştan qaçqançı ximiyä fakul'tetın tögälli. Berlinda aşçı bularaq êşlägän, tik pandemiya arqasında êşen yuğaltqan. Ata-anası häm bertuğannarı 2 yıl êlek anıñ şikelle Germaniyağa kilä. Xäzer dä ber migrant pansionında yäşilär. Alar öçen iyäläşü beraz awır bula.

Süriyä migrantı Äxmät Alsalix:

-Berniçä kön êlek äni miña Törkiyädä yäşärgä teläwen äytte. Andağı mädäniyätneñ beznekenä oxşaş buluın häm azan tawışın qabat işetä alaçağın söyläde.

Äxmät Germaniyäneñ üzenä yaxşı forsatlar birä aluın uylıy, şuña biredä qalırğa teli. Rizıq peşerergä yaratsa da, maqsatı bankir bulu. Süriyädä suğışqa qadärge tormış Äxmät häm Söläymen öçen härwaqıt matur istälek bulaçaq. İkese dä xäzer tuğan cirlärennän yıraqtağı tormışların iñ yaxşı räweştä alıp barırğa niyätli.