"Vakśina Kovid-19 kizüen tiz genä betermäyäçäk"
Belgeçlär pandemiyäneñ äle berniçä yıl däwam itäçägen farazlıy
Bötendön’ya sälamätlek saqlaw oyışmasınıñ Könbatış Tın okean bülege mödire Takeşi Kasai koronavirus vakśinalarınıñ tiz arada kizüne betermäyäçägen citkerde. Ul Könbatış Tın okean illärendä massaküläm vakśinalaştırunıñ 2021nçe yıl urtalarında bulaçağın farazlıy. “Vakśina - pandemiyäne yaqın kiläçäktä yuqqa çığara aluçı kömeş yädrä tügel,”-di Takeşi Kasai.
Belgeç äytüençä, däwlätlärneñ vakśinağa ireşüe başta çikle bulaçaq, şuña da risklı törkemdägelärgä östenlek birelüe möhim.
“Ägär kiräkle qadär vakśina citeşterü öçen investiśiyä yasalsa, 2021nçe yıl axırına qadär barlıq illärdä östenlekle törkemnärgä qadaw öçen citärlek dozağa iyä bulaçaqbız. Yuğarı risklı törkemnär tışında qalğannar öçen isä tağın 12 - 24 ay uzuı kiräk bulaçaq. Bu oçraqta da bilgesez häm kötelmägän xällär kilep çığarğa mömkin”-dip söyli Takaşi.
“Xäzerge waqıtta niqadär arığan bulsaq ta, barı üzebezne genä tügel, tirä-yün’dägelärebezne dä saqlıy torğan çaralarnı kürüne däwam itärgä, qullarıbıznı yuarğa, bitlek kiyärgä, sośial’ ara totarğa häm yoqtıru qurqınıçı yuğarı bulğan urınnardan yıraq torırğa kiräk,”-di ul.
Bötendön’ya sälamätlek saqlaw oyışması 60 yäş’tän ölkännärne häm Kovid-19 belän köräşüçe mediśina xezmätkärlären risklı törkemgä kertä. Vakśinalaştıruda bu törkemnärgä östenlek bireläçäk.
