Xacilar êssedän ülä

 Xac qılu öçen Soğud Ğaräbstanına kilgän Yordaniya, Tunis häm Marokkodan barlığı 144 keşe wafat bulğan.

Yordaniya tışqı êşlär ministrlığı beldergänçä, Yordaniyädän 75 xaci rekordlı êsselek häm êsse suğudan ğomeren yuğaltqan.

Älege keşelär terkälmägän xacilar bulğan, Yordaniyanıñ räsmi xas wäkillegendä bulmağannar. Xäbärsez yuğalğan 110 Yordaniya watandaşınıñ 96sı tabılğan.

Tunis Din êşläre başlığı İbrahim äş-Şäybi äytüençä, 49 tunislı da da izge cirlärdä wafat bulğan. Alarnıñ kübese turistik vizalar belän xac qılırğa barğan.

Şäybi ülemnärgä êsselek säbäpçe buluın belderä.

Tunis ilbaşı Kays Said 49 tunislınıñ ülemennän soñ Din êşläre başlığı İbrahim äş-Şäybine êşennän azat itkän.

Marokko waqıflar häm İslam êşläre ministrlığı beldergänçä, 20 Marokko watandaşı xac ğıybadäte waqıtında ğomeren yuğaltqan.

Hawa temperaturası 50 gradustan artqan izge cirlärdä xac qılğanda 11 ildän kim digändä 1081 xaci wafat bulğan.

Yıl sayın distälägän meñ keşe räsmi räweştä terkälmägän kileş xac qılu öçen izge cirlärgä yul tota. Terkälmägän xacilar kondiśionerlı urınnarğa kerä almıylar häm ozaq waqıt êssedä qalalar.