Könbatışta Kovid-19 kizüe

Dön’yada koronavirus kizüendä ğomere özelüçelär sanı 1 million 684 meñnän arttı.

Yoqtıru oçraqları 76 million 143 meñnän, sawığuçılar isä 53 million 430 meñnän artıq.

Amerika Quşma Ştatlarında virustan 320 meñ 845 keşeneñ ğomere özelde. İldä infekŝiyalelär sanı da 17 million 889 meň 578gä citte. AQŞ viŝe-prezidentı Mayk Pens, xäläl cefete Karen Pens häm AQŞnıñ Cämğıyät’ sälamätlege idaräse başlığı Dr. Djerom Adams turıdan-turı êfirda Pfayzer häm BioNTech vakŝinasın yasattı.

İtaliyada kizüdän ülüçelär sanı soñğı täwlektä 674kä artıp, 67 meñ 894 buldı, awırular sanı 1 million 921 meñ 778gä çıqtı. Xökümät Raştua bäyräme häm Yaña yıl kanikullarında çaralarnı arttıraçaq.

Franŝiyada Kovid-19dan barlığı 60 meñ 229 keşe yaqtı dön’yadan kitte. Koronavirus testı pozitiv çıqqan ilbaşı Makron sälamätlegeneñ yaxşı buluın citkerde.

Şveŝiyada Kovid-19 7993 can aldı. İldä xasta sanı – 367 meñ 120. İldä yaña çaralar kürelde. Restorannarda ber östäl artında barı tik 4 keşe utıra alaçaq, kiçke sigezdän soñ isertkeç êçemleklär satılmayaçaq.

Bel’giyada koronavirustan ülüçelär sanı 18 meñ 455, infekŝiyane yoqtıruçılar sanı 621meñ 39 buldı. İlgä kerüçelär öçen koronavirus testı mäcbüri xälgä kiterelde.

Virustan 1440 keşeneñ ğomere özelgän Slovakiyada infekŝiyalelär sanı 146 meñ 124 buldı. Prem’yer-ministr İgor’ Matoviçnıñ Kovid-19 testı pozitiv çıqtı.

Çilida kizüdän ülüçelär sanı 16051gä citte, awırular sanı - 581 135. Däwlät başlığı Sebast’yan Pinerağa ictimağıy urında bitleksez yörgäne öçen 3500 dollar aqçalata cäza birelde.

Kovid-19 Braziliyada 185 687, Meksikada 117 249, Angliyada 66 541, İspaniyada 48 926, Pol'şada 25 254, Ukrainada 16 469, Rumıniyada 14 157, Kanadada 14040, Êkvadorda 13 942, Niderlandta 10 405, Argentinada 41 672, Kolumbiyada 40019, Peruda 36 969, Germaniyada 25 640, Gvatemalada 4589 can aldı.