Kovid-19 - psixikanı qaqşata
Koronavirus waqıtında aqıl xastalıqları belän integüçelär artuın belderälär
Bötendön’ya sälamätlek saqlaw oyışması ğomum mödire Tedros Adxanom Gebreyesus koronavirus säbäple borçılular häm qurqunıñ millionnarça keşeneñ aqıl sälamätlegenä naçar täêsir yasawın belderde. Bu xaqta ul videokonferenśiyä yulı belän oyıştırılğan matbuğat oçraşuında söyläde. Anıñ äytüençä, kizü waqıtındağı sośial’ aralaşu citmäw bik küp keşeneñ psixologiyäsenä tirän yoğıntı yasadı.
Gebreyesus qartlar yortında häm psixiatriya xastaxanälärendäge keşelärneñ Kovid-19 qurqınıçı astında buluın da xäterlätte. Psixik sälamätlek belän bäyle xezmät kürsätüçe mediśina oyışmalarınıñ qayberläre koronaviruslılarnı däwalaw öçen yabılğan.
“Aqıl sälamätlege bolay da dön’ya külämendä iğ’tibarsız qalğan sawlıq probleması ide. Ber milliardqa yaqın keşe qaqşağan psixika belän yäşi. Här yıl 3 millionnan artıq keşe çamadan tış alkogol’ qullanıp ülä. Här 40 sekundta 1 keşe üz-üzenä qul sala,”-dip söyli Gebreyesus.
Ul psixologik xezmätlärgä bik az keşeneñ ireşä aluın assızıqladı. Gebreyesus az häm urta keremle illärdä aqıl, nevrologik häm narkotik matdälärgä bağımlı keşelärneñ 75%ınnan artığınıñ bernindi däwalaw kürmäwe turında kisätte.
