Tramp protestçılardan qurqıp bunkerğa yäşerende

Amerika Quşma Ştatlarında Djordj Floydnıñ uzğan atna Minnesotada poliśiyäneñ köç qullanuı arqasında ülüenä rizasızlıq tınmıy. Çaralar bik küp şähär häm ştatqa cäyelde. Çönki tärtip saqçılarınıñ yış qına qara tänle amerikalılarğa qarata köç qullanuı ülemnärgä kiterä.

Rizasızlar başqala Vaşington, Minneapolis, Filadel’fiya, Çikago, Los-Anjeles şikelle bik küp şähärdä uramnarnı tutırdı.

Dähşät tulı waqıyğalar arqasında Vaşingtonda cirle waqıt belän yäkşämbe könne 23 säğat’tän başlap düşämbe irtänge 6ğa qadär uramğa çığu tıyıldı. Mêr Müriêl’ Bauzer iminlekne saqlaw öçen Vaşington  poliśiyä departamentına yärdämgä milli gvardiyäçelärne çaqıruın belderde. Uramğa çığunı tağın 40qa yaqın şähärdä kertkännär.

Kaliforniyädäge Long-Biç häm San-Xose şähärlärendä bik küp kibetlär talana. İndianapolistağı çaralar waqıtında çıqqan bäreleştä isä 2 keşeneñ ülüe belderelde.

N’yu-Yorknıñ törle töbäklärendä dä poliśiyä belän bäreleşlär bulıp aldı. Distälägän protestçı saq astına alındı, tärtip saqçılarınıñ maşinaları yandırıldı.

Minneapolis şähärendä isä ber tanker şofyerı texnikasın şosseda cıyılğan meñnärçä protestçı östenä taba yörtte. Waqıyğada ülüçe yäisä yaralanuçı bulmadı. Protestçılar tanker yörtüçesenä höcüm itte. Yaralanğan şofyernı xastaxanägä ilttelär.

 N’yu-York mêrı Bill de Blasio tınıç protestçılarnıñ tıştan kilgän ber törkem tarafınnan köç qullanu häm talawlar belän provokaśiyälänüen äytte. Ul, moña qaramastan, poliśiyäneñ üze-üzen nıq totıp waqıyğalarnıñ üzeşenä çik quyuın belderde.

De Blasio sośial’ mediada zur rizasızlıq uyatqan videodağı protestçılarnıñ östenä taba poliśiyä maşinası belän kilü waqıyğası turında bolay dide: “Bu miña ber dä oşamıy, moña oxşaş tağın ber  waqıyğa kürergä telämim. Bu mäs’äläne tikşeräbez”.

İlbaşı Donal’d Tramp rizasızlıq çaralarında köç qullanuda ğayeplänüçe ANTİFAnıñ monnan soñ “terrorçı oyışma” bularaq qabul iteläçägen belderde. Şunnan yustiśiyä ministrlığı älege oyışma äğ’zaların da kertep “provokator”larnıñ êläkterelüe öçen federal’ köçlärgä kürsätmä birüen citkerde. İsemen antifaşizm süzennän qısqartıp alğan ANTİFA oyışması 30nçı yıllarda Germaniyädän çıqqan naśizmğa qarşı barlıqqa kilde.

Tramp, monnan tış, cirle demokrat idaräçelärne xäräkät itärgä başlarğa häm milli gvardiyäçelärdän yärdäm sorarğa çaqırdı. Ul Twitter aşa yasağan belderüendä rizasızlarnı “radikal’ anarxistlar” dip atadı häm alarğa bik soñğa qalğançı qarşılıq kürsätergä kiräklegen äytte.

Floydnıñ üterelüenä rizasızlıq belderüçelär comğa könne Aq Yort qarşında cıyılğanda ilbaşı Trampnı bunkerğa yäşerüläre turında süzlär çıqtı. Bu xaqta CNN Aq Yortta êşläwçe häm iminlek xezmätkäre süzlärenä tayanıp xäbär itä. Trampnı öske qatqa alıp mengänçe yaqınça 1 säğat’ bunkerda totuları alğa sörelä. Anıñ belän bergä xatını Melaniyä häm ulları Barron da şunda yäşerelä.

 Tağın ber çığanaq citkergänçä, Aq Yorttağı afät xäle “qızıl”ğa qadär mensä, Tramplarnı häm ğailäneñ başqa äğ’zaların Ğadättän tış xäl operaśiyälär üzägenä iltäçäklär.

46 yäş’lek Djordj Floyd uzğan atnada Minneapolista qulğa alınğanda ber poliśiyäneñ teze belän muyınına bastıruı arqasında berniçä minut buyı “Sulış alalmıym” dip yalvardı. Anı soñınnan xastaxanägä ilttelär, ämma qotqara almadılar. Tirä-yün’dägelärneñ kesä telefonnarı belän töşerep alğan videoları sośial’ mediağa çıqqannan soñ rizasızlıq qabardı. Bu ildäge qara tänlelärgä qarşı poliśiyäneñ dähşäte turındağı bäxäslärne qabat dörlätep cibärde. Minneapolistan başlap bik küp şähärdä cimergeç rizasızlıq çaraları başlandı.

Uzğan kiç barı tik N’yu-Yorkta 345 protestçı qulğa alındı, 33 poliśiyä xezmätkäre yaralandı. Manxêttenda 10nan artıq kibet talandı, 47 poliśiyä maşinasına ut törttelär yäisä täräzälären wattılar.