Yoqtıru oçraqları buyınça AQŞ Qıtay belän İtaliyäne uzdı

Dön’yada koronavirustan ğomere özelüçelär 22 meñnän, yoqtıruçılar sanı 500 meñnän arttı.

İtaliyädä kizüdä ülüçelär soñğı täwlektä 712gä kübäyde häm 8 meñ 215 keşe täşkil itte. Yoqtıru oçraqları – 62 meñnän artıq.

İspaniyädä Kovid-19dan ğomere özelüçelär 4 meñ 89ğa, yoqtıru oçraqları 56 meñ 188gä citte. İldä ğadättän tış xäl 11nçe aprel’gä qadär ozaytıldı.

Franśiyädä kizüdä 1696 keşe ülde.

Niderlandta çir 434 keşeneñ ğomeren aldı. Yoqtıru oçraqları 7431gä citte. Wäqalätlelär çınbarlıqta sannıñ tağın da zurraq buluın assızıqlıy, çönki xastalıq bilgeläre bulğan barlıq keşe dä test yasatmıy.

Angliyädä koronavirus 578 keşene alıp kitte. Yoqtıru oçraqları - 11 meñ 658. Poliśiyä mäcbüri bulmağan xäldä öydän çığuçılarnı saq astına alu yäisä ştraf tülätü wäqaläte aldı.  

Avstraliyädä Kovid-19dan 13 keşe ülde, 3 meñ 121 keşe awıru.

AQŞta koronavirustan ğomere özelüçelär sanı 1177gä, yoqtıru oçraqları 82 meñ 180gä citte. Şulay itep, Amerika awıruçılar sanı buyınça Qıtay belän İtaliyäne uzıp kitte.  Barı tik N’yu-York xastaxanälärenä salınuçılar ber köndä 40%qa arttı häm 5 meñ 327 buldı.