Mäxkämä "Min täñre” digän maşina nomerın röxsät itte

AQŞnıñ Kentukki ştatında ber ateist “Min täñre” (İM GOD) yazulı maşina nomerın qullanırğa röxsät itelmäwe öçen 150 meñ dollar kompensaśiyä xoquqına iyä buldı.

Benni Xart isemle älege keşe Ogayo ştatında 10 yıldan artıq şul nomer belän yörgän. 2016nçı yılda ul Kentukkinıñ Frankfurt şähärçegenä kilep urnaşa häm monda da yaratqan nomerın qullanu öçen Motorlı transport idaräsenä möräcäğat’ itä.

Ämmä Xartqa cibärelgän cawapta bu taläpneñ kileşmi torğan buluı, bäxäs qubaru mömkinlege häm başqa yörtüçelärneñ iğ’tibarın taratuı äytelä.   

Kentukki qanunnarı cenes, rasa, tän töse, din häm millät diskriminaśiyäse bulmasa, şäxsi transport nomerlarında teläsä nindi yazunıñ urın aluın röxsät itä.

Amerika grajdanlı xoquqlar berlege häm “Dindän bäysezlek waqıfı” Xart isemennän däğ’wa açtı. Älege oyışmalar tıyunıñ AQŞ Konstituśiyäse belän garantiyälängän süz iregenä qarşı kilüen belderä.

Mäxkämä älege oyışmalarnı xaqlı dip taptı. Ştatta “Min täñreneke” häm “Täñrene yaratam” şikelle nomerlar röxsät itelgändä, “Min täñre” yazulısın tıyu - tarafsızlıq prinśiplarına qarşı kilä.

Mäxkämä Xartqa advokat çığımnarı öçen 150 meñ 715 dollar kompensaśiyä tüläw turında qarar çığardı.