Qıtayda koronavirusqa qarşı daru sınayaçaqlar

Qıtayda koronavirus kizüenä qarşı daru qullanıp qarayaçaqlar. Anı monnan alda atipik pnevmoniyä (SARS) häm MERS xastalıqlarında qullanıp uñışqa ireşkännär ide.  

İl matbuğatındağı xäbärlärgä qarağanda, Qıtay xökümäte Amerikanıñ daru şirkäte tarafınnan çığarılğan Remdesivir preparatınıñ klinik täcribälären başlarğa röxsät itte. Ul koronavirus ğailäsennän bulğan SARS häm MERSqa qarşı yasalğan täcribälärdä uñay näticälär kürsätte. Anı üzlärendä sınaw öçen 761 awıru terkälgän.

Täcribälär Qıtay mediśina fännäre akademiyäse qul astında êşläwçe Qıtay-Yapon duslıq xastaxanäse häm kizüneñ märkäze Xubêy provinśiyäseneñ Uxan’ şähärendä berniçä xastaxanädä ber’yulı alıp barılaçaq.