Virustan ülüçe Qıtay tışında da bar

Berençe tapqır koronavirustan ülem turındağı xäbär Qıtaydan tügel, başqa ildän kilde. Filippinnarda xastalıq terkälgän 2 awırudan berseneñ ğomere özelde.  

Ülüçe - uzğan atnada başqala Manilada yötkerü häm tamaq awırtuına zarlanıp tabibqa möräcäğat’ itkän 44 yäş’lek Qıtay watandaşı.

Koronavirus arqasında yaqtı dön’ya belän xuşlaşuçılar sanı Qıtaynıñ üzendä dä arta. Andıylar 304kä citkän. Awırunı yoqtıruçılar 14 meñ 380 bularaq terkälgän.  2 meñ 110 keşeneñ xäle ayıruça awır.

Ülüçelärneñ gäwdäläre xastaxanägä yaqın urında krematoriy mäydannarında yandırılaçaq.  

Qıtayda kizüneñ märkäze bulğan Xubêy provinśiyäse häm virus päyda bulğan Uxan’ şähärenä yullar yabıq. Cämäğat’çelek transportı xezmät kürsätmi. Qala karantinda.

Başqa illärgä kilgändä, Berläşkän Ğaräp ämirleklärendä virus yoqtıruçılarnıñ sanı 5kä citte. Yaponiyädä andıylar - 20. Pasportın Xubey provinśiyäsennän aluçılarnı älege ilgä kertmilär.

Avstraliyädä 10 keşedä virus kürende. Qıtaydan kilüçelärne ilgä kertmilär.   

İzrail idaräse dä koronavirus säbäple 50 qıtaylınıñ ilgä kerüenä röxsät itmäde.

Bik küp däwlätlär Uxan’dağı watandaşların êvakuaśiyäläw öçen êşçänlek başladı. Annan alıp çığılğan awrupalılar 2 oçqıç belän Franśiyä häm Angliyägä kiterelde. Germaniyä üz keşelären xärbi oçqıç belän alıp qayttı. İndoneziyä 238 watandaşın êvakuaśiyäläde. Katar Qıtayğa oçışlarnı 3nçe fevral’dän başlap tuqtata.