“AQŞ tağın ber xata êşläsä cawabı bik xätär bulır”

İran ilbaşı Xasan Ruxani general Qasıym Sölaymanineñ üterelüe häm annan soñ ileneñ Ğıyraqtağı AQŞ bazalarına höcüm oyıştıruın xäterlätep, Amerika Quşma Ştatları başqa ber xata êşlägän oçraqta aña bik kisken räweştä cawap qaytarılaçağın citkergän.

İrannıñ räsmi xäbär agentlığı “IRNA” beldergänçä,Ruxani bu xaqta  Angliya prem’yer-ministr Boris Djonson belän söyläşüdä citkergän häm bu höcümneñ Berläşkän Millätlär Oyışmasınıñ 51 nçe maddäsenä yaraşlı buluın äytkän.

Ruxani AQŞnıñ töbäktäge ğamällären “terror kereşüläre” dip bäyälägän häm “AQŞ tağın ber xata êşläsä cawabı bik xätär bulır”digän.

Xasan Ruxani Awrupa illäre wäğ’dälären cirenä citkergän oçraqta İrannıñ atom – töş kileşüe qısasındağı yöklämälären ütäyäçägen beldergän.

Angliya prem’yer-ministrı Boris Djonson isä soñğı atnada küzätelgän waqıyğalar öçen bik borçıluın belderep yaqlarnı kiyerenkelekne kimetergä çaqırğan.