Siriustan kilgän kandidat yarıştan çıqtı

Angliyädä saylaw kampaniyäse başlanuğa Breksit partiyäsennän kürsätelgän ber kandidatnıñ Sirius yoldızınnan kilüen häm xökümätlärneñ başqa planeta zatlarına êşläwen söyläwe açıqlandı. Älege kandidat - yazuçı Jill X’yuz. Anıñ küp yıllar êlek äytkän süzlären çiktän tış uñ qaraşlı “Hope not hate” törkeme qabat qazıp çığarğan. Üzeneñ ğadäti bulmağan fikerläre kön üzägenä quyıluınnan soñ X’yuz saylawda qatnaşmasqa buldı.

Ul 2017nçe yılda sośial mediada “Maqsatımnıñ dön’yadağı üzañnı üsterü buluın çınlap ta añlıy başladım. Siriustan kildem” digän süzlär belän urtaqlaşqan.

X’yuznıñ “Päyğambärlek ruxı” digän kitabı da bar. Anda ul xökümätlärneñ başqa planeta zatları öçen êşläwen, ämma xäzergä bu wäzğıyat’neñ yäşerelüen alğa sörä.  

Çiktän tış uñçı Nigel Faraj liderlağındağı Breksit partiyäse Angliyäneñ Awrupa Berlegennän kileşüsez çığuın teli.

Xökümät parlamentnıñ bu mäs’älädä urtaq fikergä kilä almawı arqasında irtä saylawlar uzdırunı soradı.

Xakimiyättäge êşçe partiyäseneñ teläktäşlege belän 12nçe dekabr’dä irtä saylaw ütkärü qararı çığarıldı. Parlament 6nçı noyabr’dä taraldı häm saylaw kampaniyäse başlandı.