Franko qaberennän çığa

İspaniyäneñ Yuğarı mäxkämäse diktatör Franśisko Frankonıñ söyäklären qazıp alırğa quştı. Xökem qararı buyınça, ul Şähitlär üzänlegennän çığarılıp xatını yanına - ğailä qaberlegenä kümelergä tiyeş.

Diktatornıñ söyäklären küçerü telägen İspaniyä xökümäte belderde. Frankonıñ onıqları isä moña qarşı çıqtı. Yuğarı mäxkämä xökümätne xaqlı dip taptı.

Frankonıñ söyäkläre istälek qaberlegennän alınıp Madridnıñ Êl Pardo rayonındağı Mingorrubio ziratına ilteläçäk. Xatını Karmen Polo da şunda cirlängän.  

Franko ğailäseneñ läxetne Madridtağı Almudena Kafedralenä küçerü taläbe dä kire qağıldı.

İspaniyä matbuğatındağı xäbärlärgä qarağanda, Frankonıñ söyäklären ziratqa iltep kümü 10nçı noyabr’dä uzaçaq irtä ğomum saylawlardan alda bulaçaq.

Franko rejimınnan zıyan kürgän ğailälärne berläşterüçe cämğıyt’neñ çaqıruı buyınça Yuğarı mäxkämä qarşında cıyılğan törkem çara oyıştırdı. “İspaniyägä xıyanät itüçelär, meñnärçä keşeneñ üleme öçen cawaplı buluçılar qaberdä dä xörmät kürmäyäçäk,”-di alar.

Frankonıñ ğailäse advokatı Luis Felipe Utrera Molina: “Däğ’wanı Awrupa keşe xoquqları mäxkämäsenä iltäbez,”-digän belderü yasadı.

İspaniyä xökümäte räise Pedro Sançes isä Frankonıñ söyäklären 7 qat cir astına kümergä häm här qatnı yozaqqa bikläp, açqıçın atarğa teläwen äytkän.