Ğayepsez kileş 26 yıl törmädä utırğan

AQŞnıñ Miçigan ştatında ğayepsez kileş 26 yılın räşätkä artında kiçergän ber keşegä 1 million 300 meñ dollar kompensaśiyä tülänäçäk. 61 yäş’lek David Gavitt 1985nçe yılda yanğın çığarıp xatını häm ike qızınıñ ülemenä säbäpçe buluı öçen 1986nçı-2012nçe yıllarda törmädä utıra.

Prokuror Dana Nessel anıñ ğayepsez buluı açıqlanuın belderde. Yaña tikşerülärdän soñ Gavettnıñ maxsus ut törtüe belän bäyle dälilneñ ışanıçsız ikäne añlaşıla.  

Prokuror hiçber cämğıyät’neñ ideal bulmawın söyli. Ul Gavittnıñ räşätkesez tormışqa iyälänüeneñ ciñel bulmawın, ğayepsez kileş ozaq waqıt törmädä utırğan keşegä kompensaśyä tülänergä tiyeşlegen äytä.  

Miçigan ştatında cinayät’ êşlämägän kileş mäxküm buluçılarğa törmädä ütkärgän här yıl öçen 50 meñ dollar kompensaśiyä tülänä ala.

Gavittnıñ xatını häm 2 qızı 1985nçe yılda İyoniyadağı öylärendä çıqqan yanğında hälaq bula. İr keşe üze anda yaralanıp atnalar buyı tabiblar küzätüe astında qala.

Gavitt xatını häm üzeneñ tämäke tartuın häm yanğınnıñ yalğışlıq belän çığuın belderä.