Sarı jiletlılar qabat uramda

Franśiyädä sarı jiletlılar ilbaşı Êmmanuêl’ Makron idaräse säyäsätenä rizasızlıq belderep qabat uramnarğa çıqtı. Alar Parijnıñ törle noqtalarında çaralar oyıştırdı. Ber öleşe başqalanıñ simvolı Şanzêlize uramında cıyıldı häm annan Lüksemburg baqçasına taba yörde.

Ber ük waqıtta, Şarl’ de Goll’ aêroportında da çara oyıştırıldı. Anda qatnaşuçılar aêroport êçendä “Makron kitsen” şiğar’läre qıçqırıp yörde häm älege ob’yektnı xosusıylaştırırğa teläwçe xökümätkä rizasızlıq belderde.

Tağın ber törkem demonstrant Êyfel manarası qarşındağı mäydanda cıyıldı.  

İminlek köçläre Şanzêlize uramında taş häm şeşä atuçılarğa su puşkaları belän qarşılıq kürsätte.

Başqaladağı rizasızlıq çaralarında 19 keşe saq astına alındı.

Nantes şähärendäge demonstraśiyädä poliśiyä küz yäşe çığaruçu gaz qullandı, 2 keşene izolyatorğa alıp kittelär. Kemper häm Bezansonda da tärtip saqşıları gaz belän qarşılıq kürsätte. Falsburg xakimiyäte isä poliśiyägä küz yäşe çığaruçı gaz qullanunı tıydı.

Franśiyä êçke êşlär ministrlığı mäğ’lümatlarına qarağanda, il külämendä uzğan çaralarda 28 meñ 600 keşe qatnaştı. Uzğan atna bu san 39 meñnän artıq ide.