Tramp İlhan Omarnı telämi

Amerika Quşma Ştatları däwlät başlığı Donal’d Tramp soňğı könnärdä antisemitizm bäxäsläre belän kön tärtibenä kilgän Kongressnıň möselman äğzase İlhan Omarnıň Kongresstan yäisä wazifa başqarğam komitettan kitüe zarurlığın citkerde.

Tramp Aq Yorttağı kabinet cıyılışında: “Minemçä Kongress yäisä Wäkillär Parlamentınıň tışqı mönäsäbätlär komitetındağı wazifasınnan üz teläge belän kitärgä tiyeş. Antisemitizmğa AQŞ Kongressında urın yuq. Kongress äğzase Omarnıň ğafu ütenüe dä citärle tügel ide,” – dide.

Tramp mäs’älä belän bäyle kiçä yasağan açıqlawında da tübändägeçä citkerde: “Minemçä ul üzennän oyalırğa tiyeş. Bik naçar açıqlaw yasadı häm ğafu ütenüeneň citärle buluın uylamıym.”

Kongresska kergän berençe yawlıqlı möselman xatın-qız bulğan İlhan Omar üze xaqındağı antisemitizm ğayepläwlärennän soň Twitterda açıqlaw yasağan ide.

Amerikadağı yähüdlärdän ğafu ütengän Omar İzrailneň AQŞtağı lobiçelek êşçänleklärenä küz yommaw zarurlığın beldergän ide.

Antisemitizmnıň çınbarlıq buluın äytep, monı üzenä öyrätkän yähüdlärgä räxmäten beldergän Omar: “Maqsatım yähüd saylaçılarımnı häm Amerikadağı yähüdlärne üpkälätü tügel ide. Ğafu ütenäm,” – dip yazdı.