Paqıstanda qarğa söyenälär

Anda qorılıqtan qotqarğan qarnı “Xodaynıñ räxmäte” dip atadılar

Paqıstanda qarğa söyenälär

Suğa qıtlıq kiçerüçe Paqıstanda sonğı 48 yılnıñ in köçle qarı yawdı. Ayıruça ilneñ tön’yağı häm tawlı cirleklärdä yawım-töşem rekord däräcägä citte. Qayber urınnarda qarnıñ biyeklege 2 metr. Yawım-töşem su däräcäsen arttırudan tış qorılıq bulğan urmanlı töbäklärdä dä tabiğıy xäweflärne azalttı.  

Paqıstan xökümäte räise İmran Xan yawım-töşemne “Xodaynıñ räxmäte” dip atadı. “Yañğırlar su çığanaqların tulılandıraçaq, qarlar isä êrep yılğa häm böyälärebezgä östäläçäk” dip söyende ul.

Paqıstan su çığanaqları tikşerenü şurası iyül’ ayında xisap yasap, ilneñ Hind yılğası häm yawım-töşem tışında su çığanağı al’ternativası az buluın, 2025nçe yılda su qıtlığı çığu mömkinlegen belderde.

Meteorologlar cäy buyı ğadättän tış köçle êsselek belän köräşkän ildä su mäs’äläsen köz köne musson häm fasıl yañğırları xäl itär dip beldergän ide, ämma yawım-töşemnär citärlek bulmadı. Soñğı yıllarda musson yanğırlarında azayu küzätelä.

Paqıstan meteorologiyä departamentı mäğ’lümatlarına qarağanda, 2017nçe yılda musson yanğırları urtaça kürsätkeçtän azrak ide. 2018nçe yılda qışqı yawım-töşemnär dä urtaçanın yartısınnan azraq bularaq terkälde.

Oyışma yawım-töşem däräcäseneñ här yıl kimi baraçağın farazlıy.



Bäyläneşle xäbärlär