AQŞta qar buranı

AQŞnıñ urta häm tön’yaq-könçığış ştatları qar buranı häm suıq hawa yoğıntısı astında qaldı. Naçar hawa şartları säbäple ber keşeneñ ğomere özelde.  

Oçqıç säfärlären küzätep baruçı “FlightAware” şirkäte mäğ’lümatlarına qarağanda, AQŞta 5 meñgä yaqın oçış ğamäldän çığarıldı. Çikago, N’yu-York, Boston häm Vaşington arasındağı Amtrak poyezd säfärläre dä tuqtap tora.

Meteorologlar, Missuri ştatınıñ kön’yaq-könçığışınnan başlap 15 ştatnıñ qar buranı häm suıq hawa yoğıntısı astında buluın belderep, kisätü yasadı.

129 yulçı belän Arizona Fenikstan kütärelgän ber oçqıç Çikağo O’Xara xalıqara aêroportına töşep utırğanda tayıp kitä häm trassadan çığa. Wäqalätlelär waqıyğada ülüçe yäisä yaralanuçı bulmawın belderde.

Kanzasta qar çistartu texnikası qaplanıp ber keşeneñ ğomere özelde. Missurida 15 maşina ber-bersenä bärelep çılbırlı yul qazası kilep çıqtı.

Qayber urınnarda qar qalınlığı 60 santimetrğa citkän. Bu kiç hawa temperaturasınıñ -35 gradusqa qadär töşüe kötelä.

Qar buranı häm suıq hawanıñ  qotıplardan kilgän yuğarı basım belän kön’yaqtan kilgän tübän basımnıñ bareleşüe näticäse dip belderälär.

AQŞ ilbaşı Donal’d Tramp Twitter xisabı aşa qar buranı qaplağan mäydannıñ zurlığına basım yasap amerikalılarnı iğ’tibarlı bulırğa çaqırdı.

“Qar buranınıñ zurlığı şaqqattırğıç. Xäzer ul dön’yaküläm hawa cılınunıñ berazı kilsä, naçar bulmas ide,”- dip törtterde ul.