Ğıyraqta Ciñü köne

Ğıyraqta terrorçı oyışma DEAŞnı ciñüneñ ber yıllığı uñayınnan 10nçı dekabr’ - räsmi räweştä yal köne bularaq iğ’lan itelde. İlneñ xökümät räise Adil Abdulmäxdi beldergänçä, düşämbe könne däwlät bayraqları kütäreläçäk. Şulay uq, uramnarğa, öylärgä häm maşinalarğa da bayraq êlergä kiñäş itälär.

Ul könne säğat’ köndezge berdä il külämendä 1 minut tınlıq bulaçaq. Xökümät kiçen watandaşlarnı uramda bäyräm itärgä çaqıra. Abdulmäxdı ul könne xalıqqa möräcäğat’ tä yasayaçaq.

Räsmi çığanaqlardan alınğan mäğ’lümatlarğa qarağanda, düşämbe könne xökümät binaları häm qayber ilçeleklär urnaşqan köçle saq astındağı Yäşel zonanıñ ber öleşe maşinalar ütü öçen açılaçaq.  

Ğıyraq Körd üzidaräle töbägendä isä düşämbe räsmi yal bulmayaçaq.

Ğıyraqnıñ êlekkege xökümät räise Xäydär äl-İbadi uzğan yıl 9nçı dekabr’dä ilneñ terrorçı oyışma DEAŞtan tulısınça çistartıluın belderep, ciñü iğ’lan itkän ide.