Tramp finlyandiyälelärne şaqqattırdı

AQŞ däwlät başlığı Donal’d Tramp finlyandiyälelärne şaqqattırğan belderü yasadı. Ul älege Tön’yaq Awrupa däwlätendä urmannarnı tırma belän çistartuların äytte. Bu Kaliforniyädäge yanğın kitergän zarar turında söyläşkändä bula. Tramp il tarixındağı iñ cimergeç urman yanğınınıñ säbäbe itep biredäge êşçänlekneñ citärle bulmawın kürsätä.

“Başqa illärgä qarasağız, bu êşne bötenläy ikençe törle ütilär. Finlyandiyä ilbaşı belän söyläşkändä, ul, urmannarı küp bulğanğa, bu êşşänlekne başqa törle başqaruların söyläde. Tırma belän çistartu öçen bik küp waqıt sarıf itälär häm bernindi problema kilep çıqmıy,”-dide ul.

Finlyandiyä ilbaşı Sauli Niinisto isä, İlta-Sanomat gazetına interv’yu birep, Tramp belän oçraşqanda andıy süz äytüen xäterlämäwen belderde. Ul Finlyandiyäneñ urmannar belän qaplanuın, yaxşı küzätü sisteması häm çeltärenä iyä buluların telgä alğan.

Trampnıñ açıqlawı finlyandiyälelärne bik aptırattı häm sośial’ mediyada ürtäşügä säbäp buldı.

AQŞta Kaliforniyä ştatınıñ tön’yağında däwam itüçe häm yaqınça 570 kvadrat kilometrğa cäyelgän yanğında 76 keşeneñ ğomere özelde, 11 meñnän artıq bina qullanılmas xälgä kilde. 300 keşeneñ xäbärsez yuğaluın belderälär.