"Qara ärcä" tabıldı
İndoneziyada qazağa oçrağan oçqıçnıñ mäğ’lümat tuplawçı caylanmasın diñgez töbennän çığardılar
İndoneziyada hawağa kütärelgännän soñ qısqa waqıt êçendä qazağa oçrağan yulçı oçqıçınıñ "qara ärcä"sen taptılar.
Kompas TV kanalınıñ xäbärenä qarağanda, cihaz oçqıç kilep töşkän urında - diñgez astında 30 metr tiränlektä bulğan. Anı diñgez xärbi köçläreneñ dayverları tabıp çığara. Qara ärcäne tikşerü öçen maxsus oyışmağa iltkännär.
Oçqıç qazası düşämbe irtän buldı. Ul Djakartadan Sumatra utrawına baru öçen hawağa kütärelgän ide. 13 minuttan oçqıç radarlardan yuğaldı. Anıñ êçendä 181 yulçı häm 8 keşelek êkipaj bar ide. Älegä qadär isän qaluçı tabılmadı. Skaner belän tikşerü barışında diñgezneñ 32 metr tiränlegendä 22 metr ozınlığındağı cisem terkälde. Anı oçqıçnıñ korpusı buluın farazlıylar. Belgeçlär xäzer älege cisemneñ küreneşen açıqlarğa tırışa.
