AQŞta ğarasat üz täêsiren kürsätä
Yar buyı töbäklärendä ğadättän tış köçle cil häm yañğırlar xakimlek itä
Florenśiyä ğarasatı Amerikanıñ yar buylarında täêsiren kürsätä başladı. Tön’yaq häm Kön’yaq Karolina ştatlarında ğadättän tış köçle cil häm yanğırlar xakimlek itä. Alarnıñ keşe tormışına qurqınıç yanawı turında belderälär. Meteorologlar cil tizlegeneñ säğatenä 128 kilometrğa citäçäge häm okeandağı dulqınnarnıñ 4 metrğa menäçäge turında kisätä.
Belgeçlär ğarasatnıñ Atlantik okean buyınça yarğa kilep citkänçe quäteneñ 2nçe kategoriyägä qadär töşüen, ämma, şuna qaramastan, töbäktä täêsireneñ zur bulacağın xäbär itä.
N’yu Bern şähärendä kibetlär häm yağulıq stanśiyäläreneñ kübese yabıq, açıq bulğannarınıñ qarşında isä ozın çiratlar tezelgän. Qalanıñ ber öleşe okeannan kilgän köçle dulqınnar näticäsendä su astında qalğan. Şähärdä ğadättän tış xäl iğ’lan itelde. Räsmi dairälärneñ barısı yabıq. Poçta bülegeneñ işegenä “Poçta Florenśiyä uzıp yañadan êlektr birelgängä qadär açılmayaçaq” digän belderü êlengän.
Cirlektä yäşäwçelär ğarasattan saqlanu çarası bularaq täräzä häm işeklären taqtalar belän qağıp quyğan. Maşina yullarında da iskärtülär tora.
