Oskarlı aktrisa arakanlı möselmannarğa yärdämgä çaqıra

BMOnıñ yaxşı niyät ilçese, Oskarlı Gollivud yoldızı Keyt Blanşet arakanlı möselmannarnıñ kürgän zolımnarın onıta almawın belderde. Ul Bangladeştağı sıyınuçılar lagerenda kürgännären oyışmanıñ İminlek şurasındağı M’yanma cıyılışında urtaqlaştı.

Blanşet möselman lagerenda 18 yäş’lek Läylä isemle xatın-qıznıñ tormış xikäyäsen onıta almawın söyläde. Älege arakanlı yäş’ xanımnıñ iren qulğa alğannar, soñınnan öyenä bärep kergännär. Läylä qoçağındağı bäbäye belän Bangladeşqa qaçqan. Yulda alar könnär buyı urmandağı ağaçlar häm ülännärne aşap yäşärgä mäcbür bulğan.  

Blanşet, şulay uq, yanğan öy êçennän qotqarılğan, ämma gäwdäsendä peşüdän êzlär qalğan bala turında da täêsirlänep söyläde.  “Başta mondıy xällärneñ oxşaşı bulmawın uyladım, läkin, Bangladeşqa qaçqan başqa ğailälär belän tanışqannan soñ, härberseneñ kürgännäreneñ qotoçqıç räweştä ğadätigä äylänüen añladım. Min dä äni keşe häm oçraşqan härber möhacir balanıñ küzlärendä üz balalarımnı kürdem. Här äti-änineñ küzlärendä üzemne kürdem. Ana keşe balasınıñ utqa atıluına niçek tüzä alır. Alarnıñ söylägännären berniçek onıta almıym. Şunıñ öçen dä xalıqara solıx häm iminlekne täêmin itärgä burıçlı bulğan BMO İminlek şurasınıñ bu krizisnı çişü öçen bergäläp eşläwen telim,”-dide aktrisa.     

Blanşet bu xällärneñ Arakandağı täwge räximsezlek dulqını bulmawın, zolımnarnıñ soñğı 40 yılda daimi däwam itüen assızıqladı. “Bügen tuğan cirennän quıluçılar şulqadär küp ki, M’yanmadan çittä yäşäwçe arakanlı möselmannar sanı M’yanmadağıdan tağın da kübräk,”-dip belderde yaxşı niyät ilçese.  Ul älege xalıqnıñ ixtıyaclarınıñ barı 33%ı ğına qanäğat’länderelüen belderde. “Bu xäl şaqqattıruçı buludan bigräk oyaltuçı. Lager’larğa yaqın rayonnarda yäşäwçe bangladeşlı awıl xalqı krizis başlanğanda arakanlı möselmannarğa qoçaqların açtı. Ägär bu keşelär mondıy igelekle adım yasıy ala ikän, bez nişläp tağın da yaxşısın yasıy almıybız,”-dip söyli Keyt Blanşet. Ul, şulay uq, arakanlı möselmannarnıñ öylärenä kire qaytu öçen watandaşlıq alırğa teläwlären dä äytep uzdı. Aktrisanıñ fikerençä, bu barlıq keşelärneñ töp xoquqı häm BMO bu yünäleştä qulın sızğanıp êşlärgä tiyeş.