Maduronıñ êşen FBR tikşeräçäk

Venesuêla däwlät başlığı Nikolas Maduroğa ike dron belän yasalğan bombalı höcümne tikşerüdä AQŞ ta qatnaşırğa mömkin. Cirle êkspertlarğa yärdämgä federal’ tikşerenü byurosın (FBR) çaqırırğa cıyınalar.  

BiBiSi xäbärenä qarağanda, üterergä mataşuda qatnaşuçılarnıñ Florida, Peru häm Kolumbiyägä qaçuı farazlana. Maduro: “AQŞ xökümäte tikşerenü öçen FBRnıñ xezmättäşlegen täq’dim itsä - monı qabul itäçäkmen,”-dide. Ul AQŞnıñ Florida ştatında Venesuêladan migrantlarnıñ küp yäşäwen häm anda cinayät’ne planlaştıruçı terrorçı berämleklärneñ buluın farazlıy.  Maduro Peru xökümätenä möräcäğat’ itep, älege ildä yäşäwçe şöbhälelärne qullarına birergä çaqırdı.

Venesuêlo däwlät başlığı Nikolas Maduro uzğan atna şimbä könne başqala Karakasta ber tantana waqıtında çığış yasağanda höcümgä duçar buldı. Anı şartlatuçı tutırılğan dronnar belän üterergä mataştılar. Waqıyğada qorbannar bulmadı, 7 xärbi yaralandı.

Höcümnän soñ Maduro bu êşneñ venesuêlalı oppoziśiyä häm Kolumbiyä belän bäyläneşle buluın telgä aldı. 6 şöbhälene soraştırdılar. Alarnıñ cawapları cinayät’kä Kolumbiyädä sörgendä yäşäwçe êlekkege parlament räise häm oppoziśiyä liderı Xulio Borgesnıñ cawaplı buluın alğa sörde. Oppoziśiyä deputatı Xuan Rekyusenstan da şöbhälänälär.

Venesuêla tışqı êşlär ministrı Xorxe Arreaza uzğan atnada Karakasta AQŞnıñ yuğarı däräcäle diplomatı Djeyms Stori belän oçraşıp, xezmättäşlek turında soradı.