Torontodağı höcümne DEAŞ üz östenä aldı, ämma…

Kanadanıñ Toronto şähärendä yäkşämbe tönendä oyıştırılğan häm 2 keşeneñ üleme, 13 keşeneñ yaralanuına säbäp bulğän qorallı höcümne DEAŞ üz östenä aldı. Bu xaqta ilneñ matbuğatında çıqqan xäbärlärdä äytelä. Alar terrroçı oyışmanıñ kontrolendä sanaluçı Amaq xäbär agentlığına sıltama belän yazalar.

Anda höcümne 29 yäş’lek Faisal Xussainnıñ tormışqa aşıruın häm anıñ “İslam däwläte”neñ ğaskärendä buluın äytälär. “Maqsatı DEAŞqa qarşı koaliśiyä illärenä häm watandaşlarına cawap birü” diyelä Amaqnıñ xäbärendä.   

Toronto poliśiyäse höcüm belän bäyle tikşerüneñ däwam itüen belderde. İminlek bülege mödire Mark Sonders: “Bu êtapta höcümneñ DEAŞ tarafınnan yasaluı balan bäyle süzlärne dälilli almıybız,”-dide.  

Kanadanıñ Toronto şähärendä yäkşämbe könne bulğan höcümdä 29 yäş’lek Faisal Xussain uramdağı aşaw-êçü häm küñel açu urınnarındağı keşelärgä mıltıqtan ut açtı. Anda 2 keşe ülde, 13 keşe yaralandı. Höcümçene waqıyğadan soñ üle kileş qulğa töşerdelär.

Xussainnıñ äti-änise balalarınıñ depressiv buluın, ruxi yaqtan sälamätlege qaqşawın häm däwalanuın söyläde.