Balalarnı çığara başladılar

Taylandta taqım bularaq gizügӓ çıqqan hӓm mӓğarӓdӓ yuğalğannan 9 könnӓn soñ isӓ-imin kileş tabılğan 12 futbolçı bala hӓm trenerların mӓğarӓdӓn çığaru êşe başlandı.

Çiang Rai vilayӓt’ başlığı Narongsak Osatanakorn bügen irtӓn başlanğan qotqaru operaśiyasendӓ 13 çit il hӓm 5 Taylandlı vodolaznıñ qatnaşuın ӓytte.

Qotqaru operaśiyaseneñ öleşçӓ su belӓn tulğan mӓğarӓdӓge şartlarğa bӓyle bularaq 2dӓn alıp 4 köngӓ qadӓr baraçağı belderelde.

Törkem bulğan urın belӓn mӓğarӓgӓ kerü urını arasında ber-bersenӓ totaşqan öçӓr çaqrımlıq ike tunnel’ sisteması bar.

Bu tunnellӓrdӓ su basıp alğan şaqtıy tar urın hӓm gelereyalar bar.

Balalarnıñ bu urınnardan su astınnan çığarıluı berdӓnber variant buldı.

Vodolaz beleme bulmağan hӓm qayberlӓre yözӓ belmӓwçe balalarnıñ professional vodolazlar da berniçӓ sӓğattӓ uza aluçı bu yullardan çığarıluı risklı dip belderelgӓn ide.

11-16 yӓşlӓrendӓge 12 bala belӓn trenerları 23 iyun’ könne Tham Luang Nang Non mӓğarӓsenӓ gizü oyıştırğan, mӓğarӓgӓ kergӓn urınnı su basudan soñ çığa almağan ide.

Yuğalğan törkem mӓğarӓdӓ 9 kön barğan êzlӓw êşçӓnleklӓrennӓn soñ tabıldı, lӓkin yañğır suları arqasında çığa almağan ide.