Franśiyada Fälästin häm Qudüskä teläktäşlek çaraları
Küpsanlı ictimağıy oyışmalarnı berläştergän “Fälästin platformı”nıñ çaqıruı belän xalıq Strasburgnıñ Kleber mäydanında häm Liondağı Terro mäydanında cıyıldı
Franśiyada İzrail’neñ üterülärenä qarşı Fälästin häm Qudüskä teläktäşlek çaraları ütkärelde. Küpsanlı ictimağıy oyışmalarnı berläştergän “Fälästin platformı”nıñ çaqıruı belän xalıq Strasburgnıñ Kleber mäydanında häm Liondağı Terro mäydanında cıyıldı.
Strasburgtağı çarada yaqınça 2 meñ keşe qatnaştı. Anda AQŞnıñ qanatı astına sıyınğan İzrail’ idaräseneñ xalıqara xoquq häm keşe xaqların ayaq astına salıp taptap ozaq yıllar Fälästin xalqına yasağan zolımnıñ 14nçe mayda yuğarı noqtağa citüen häm 65 keşeneñ ülemenä, 3 meñgä yaqınınıñ yaralanuına kitergän qanlı cinayät’ buluın assızıqladılar.
“Fälästin platformı” wäkilläre İzrail’ iminlek köçläreneñ fälästinlelärne üterülären köçle tänqıyt’kä tottı. Alar ozın yıllar buyınça törmägä äwerelgän Gazzädäge bu üterüneñ - Netan’yaxu idaräseneñ Urta Könçığışta cimerü häm terrorçılıq säyäsäten däwam itüeneñ dälile bularaq kürä.
Çarada “Fälästin yäşäyäçäk, Fälästin ciñäçäk”, “Fälästingä teläktäş bul, üterülärne tuqtat”, “Barıbız da fälästinle” şikelle franśuzça şiğar’lär qıçqırdılar. Qatnaşuçılarğa 15 därnäk häm oyışma yärdäm itte.
Liondağı çarağa isä yaqınça 500 keşe çıqtı. Anda Törkiyä, Fälästin häm Franśiya bayraqları cilferdäde. Qatnaşuçılar xalıqara cämäğat’çelek häm Franśiya idaräsenä möräcäğat’ itep, İzrail’ cinayät’lärenä däşmiçä qalmasqa çaqırdı.
