BMO İminlek şurası äğ’zaları xat yazdı

BMO iminlek şurasınıñ 15 äğ’za ilennän 10sı ğomum särqatib Antonio Guterrişqa xat yazıp, oyışmanıñ İzrail’ basıp alğan Fälästin cirlärendä qanunsız cirläşülärgä çik quyuın taläp itkän qararında nıq toruın teläde.

Xat cibärüçe illär Qıtay, Franśiya, Boliviya, Kot-d’İvuar, Êkvatorial’ Gvineya, Qazaqstan, Kuveyt, Niderlandlar, Peru häm Şveśiya. Alar, şulay uq, AQŞ ilçelegeneñ Qudüskä küçenüe häm İzrail’ armiyasınıñ Gazzä çigendäge rizasızlıq çarasında qatnaşuçılarğa ut açıp 59 keşeneñ üterelüenä mönäsäbäten belderä. Xatta BMO İminlek şurasınıñ 2016nçı yılda qabul itelgän häm İzrail’neñ Fälästin cirlärendä qanunsız urnaşularğa çik quyuına basım yasağan qanunınıñ tormışqa aşmawına borçılu citkerelä.  “İminlek şurası qararında nıq torırğa häm anıñ mäğ’nälelegen isbatlarğa tiyeş, yuqsa xalıqara sistemanıñ ışanışlı buluın soraw astına quyarbız,”-diyelä möräcäğat’tä.

Şuranıñ 10 äğ’zası bu qararnı tormışqa aşıru turında här 3 ayda yazmaça xisap birelergä tiyeşlegenä basım yasıy.

BMO iminlek şurasınıñ älege qararına 2016nçı yılnıñ 23nçe dekabrendä AQŞ veto quyğan ide.