Su basudan ülüçelär sanı artqan
Brazliyädä su basu afäte küzätelä
Braziliyäneñ kön’yağındağı Riu - Grandi- du - Sul ştatında köçle yawım-töşemnär kiterep çığarğan su basudan ğomerlären yuğaltqan keşelär sanı 56ğa, yuğalğannar sanı 67gä citkän.
Bu xaqta ştatqa bäyle Grajdannar saqlanu bülekçäse xäbär itä.
Oyışma belderüendä äytelgänçä, yañğırlar häm su basu arqasında kim digandä 24 meñ keşe öylären taşlap kitärgä mäcbür bulğan, köçle yawım-töşemnär 71 meñ 300 keşegä tiskäre yoğıntı yasağan.
Riu- Grandi- du - Sul ştatı gubernatorı Êduardo Leyt “Bez ğadättän tış xäl kiçeräbez, bu däwlät tarixında iñ ayanıçlı waqıyğa” dip beldergän häm êzläw - qotqaru êşläreneñ däwam itüen äytkän.
Leyt faciğanıñ zurlığı arqasında 180 könlek afät torışı iğ’lan itülären, xalıqnı êvakuaśiyäläw öçen zur köç quyuların citkergän.
Ştatta su basu näticäsendä yullar häm küperlär cimerelgän.
Köçle yawım-töşemnär häm su basu küzätelgän ştatqa kilgän Braziliya däwlät başlığı xökümät bularaq ştatqa tulı yärdäm kürsätülären beldergän.
