Awrupa Berlege Rusiyägä möräcäğat’ itte.
Rusiyädä xökümätkä qarşı çaralarda meñnän artıq keşe saq astına alınğannan soñ, Awrupa berlege Mäskäw idaräsenä möräcäğat’ itte.
Rusiyädä xökümätkä qarşı çaralarda meñnän artıq keşe saq astına alınğannan soñ, Awrupa berlege Mäskäw idaräsenä möräcäğat’ itte. Alar xalıqara cawaplılıqnı cirenä citkerergä çaqıra. Awrupa Berlege tışqı êlemtälär häm iminlek säyäsäte yuğarı wäkile Federika Mogerini ofisı beldergänçä, rizasızlıq kürsätüçelärneñ qulğa alınuı häm alarğa qarşı köç qullanılu üz fikereñne belderü häm cıyın iregenä qarşı kilä. Anda bu asıl xoquqlarnıñ Rusiyäneñ töp qanunında da urın aluı häm saqlanırğa tiyeşlege assızıqlana. Östäwenä, qulğa alınuçılar arasında jurnalistlarnıñ da buluı matbuğat iregen çikläwen belderälär. .
Awrupa Berlege yabıludağı meñnärçä demonstrant häm qaläm iyälären azat itärgä öndäde.
Rusiyäneñ küp kenä şähärlärendä meñnärçä keşe rizasızlıq çaralarına çıqtı. Bu mart ayındağı ilbaşı saylawlarında qabat ciñgän Vladimir Putinnıñ 7nçe mayda ütäçäk inauguraśiya tantanası belän bäyle. Uramğa çığuçılar başında Rişwätçelek belän köräş fondın tözüçe häm Rusiyäneñ tanılğan oppoziśionerı Aleksey Naval’nıy tora. Çarada qatnaşuçılar Putin häm xökümätkä qarşı şiğar’lär qıçqırdı.
Naval’nıy üze Mäskäwdäge mitingqa çığuğa diyärlek poliśiya tarafınnan saq astına alındı. Rizasızlar belän Putin tarafdarları arasında tartışu çıqtı. Şunnan soñ poliśiya çarağa kilüçelärgä kisken qarşılıq kürsätte häm mitingnıñ qanunsız buluına basım yasap bik küp keşene qulğa aldı.
