İzrail' xärbiläreneñ skandallı videosı

İzrail’ xärbiläre Gazzä çigendä ütüce “Böyek qaytu yöreşe” qısalarındağı tınıç demonstraśiyägä ut açıp 3 fälästinlene yaraladı. Cirle çığanaqlardan alınğan mäğ’lümätkä kürä, höcüm çın yädrälär belän yasalğan.

Fälästinlelär İordannıñ könbatış yarı häm Gazzä çigendä 30nçı marttan birle çaralar ütkärä. Sörgengä cibärelüçelär üz cirlärenä kire qaytırğa röxsät häm 2006nçı yıldan birle Gazzädä tormışqa aşırıluçı xoquqsız qamalışnıñ beterelüen taläp itä. Rizasızlıq çaralarınıñ berençe könennän başlap İzrail’ xärbiläre 41 fälästinlene şähit itte. Yaralanuçılarnıñ sanı 4 meñgä yaqın.

İordannıñ könbatış yarında Nablus şähärendä fälästinle protestçığa plastik yädrä atıp tidergän izrail’le xärbineñ şatlıqtan qıçqıruı videoğa töşerelgän. Häm ul internetta taraldı. Video 13nçe aprel’dä töşerelgän. Anı İzrail’ keşe xoquqları oyışması xalıqqa çığardı. Videoda 3 xärbineñ fälästinlelärne yıraq ber urında kötep toruı kürenä. Rizasızlıq çarasında qatnaşuçılarnıñ yaqınlaşuın kürgäç, ber xärbi mıltığın alarğa tözi. İkençese aña: “Aq bulğanı tağın da ğayrätle kürenä. Yaqınraq kilsen. Beraz kötep tor,”-di. Soñınnan atış yasala häm yädrä tiyä. İzrail’ xärbiye söyeneçtän qıçqırıp cibärä häm atılğan keşegä qarata sügenü süzläre äytä. Axırdan üz aralarında söyläşüdä yädräneñ çın bulmawına ükenüläre işetelä.