Rusiyä cawap qaytardı
60 Amerikan diplomatı ildӓn çığarılaçaq
Rusiyӓneñ tışqı êşlӓr ministrı Sergey Lavrov AQŞnıñ Sankt Peterburgtağı konsullığın yabıp, 60 Amerikan diplomatın ildӓn çığaraçaqların açıqladı.
Angliya belӓn berlektӓşlӓre êlekke rus şımçı Sergey Skripal’ waqiğası nigeznamӓse belӓn Rusiyӓgӓ qarşı başlatqan kampaniya xaqında Mӓskӓwdӓn berençe tögӓl cawap qaytarıldı.
Angliyaneñ 23 rus diplomatın ildӓn cibӓrüe hӓm 25tӓn artıq könbatış ileneñ 150dӓn kübrӓk rus diplomatın ildӓn çığaruınnan soñ Rusiyӓ tışqı êşlӓr ministrı Sergey Lavrov nindi cawap qaytaraçaqların açıqladı.
“Şul uq sanda diplomatnı ildӓn çığaraçaqbız hӓm Sankt Peterburgtağı konsullıknıñ êşçӓnlek kürsӓtüe kileşüen beterӓçӓkbez,” – digӓn Lavrov könbatış yasağan adımnarğa cawap qına qaytarmayaçaqların, ӓ kübrӓk nӓrsӓne başqaraçaqların citkerde.
Tışqı êşlӓr ministrlığı açıqlawına kürӓ AQŞnıñ Mӓskӓwdӓge ilçelegeneñ 58 hӓm AQŞnıñ Yekaterinburgtağı konsullığınıñ 2 xezmӓtkӓre telӓnmӓgӓn keşe itep iğlan itelde.
Açıqlawda ӓlege diplomatlarnıñ 5 aprel’ könenӓ qadӓr Rusiyӓdӓn kitülӓre zarurlığı belderelde.
Rusiyӓneñ Seattledağı konsullığınıñ yabıluına cawap bularaq ta AQŞnıñ Sankt Peterburgtağı konsullığı yabılaçaq.
Lavrov Rusiyӓ cawabınıñ rus diplomatların ildӓn çığarğan barlıq illӓrne üz êçenӓ alacağın belderde. Bu isӓ 150dӓn artıq diplomatnıñ Rusiyӓdӓn cibӓrelӓçӓgen añlata.
Lavrov êlekke şımçınıñ ağulanuı belӓn bӓyel bularaq ta: “Dӓğwağa qarağan tikşerü ӓlegӓ tӓmamlanmadı. İngliz poliśiya oyışması monıñ berniçӓ ayğa suzılaçağın citkerӓ, lӓkin qarar çıqqan inde, bu borçu tudıra. Xalıqara xoquqnı bu qadӓr mısqıllawnı moñarçı kürmӓdek,” – dide.
